?Yu Yu Naf Blong Luksave Wanem i Stret Mo Wanem i No Stret?
“Mi bin kilim i ded samwe long 25 man. . . . Evri dei mo evri naet, wan pija blong samting we mi bin mekem i stap klia long tingting blong mi. Long naet, mi kasem ol rabis drim. . . . Maet mi go samples mo mi luk fes blong wan man we i mekem mi mi tingbaot olgeta we mi bin kilim olgeta oli ded. Ol samting ya oli klia nomo long tingting blong mi, i olsem we i hapen tede, naoia nomo. . . . Mi no save fogivim mi wan from ol samting ya we mi bin mekem.”—V.S.
“Oli givim oda long mi blong go insaed mo kilim ol enemi oli ded. . . . Mi no wet mo tingting fastaem se bambae i gat sam man, woman, mo pikinini, no olsem wanem. . . . Tingting blong mi long taem ya, mo naoia tu, se mi mas mekem olsem oda we mi kasem. Mi mekem wanem we oli talem long mi blong mekem mo mi no gat tingting nating se mi mekem wan rong.”—W.C.
LONG Maj 16, 1968, tufala man ya we yumi tokbaot antap, tufala i joen long wan faet we biaen, plante man oli talem se hem i agensem olgeta loa blong wol long saed blong raet blong man. Tufala man ya, wetem sam narafala soldia bakegen, oli go insaed long wan smol velej blong ol man Vietnam, mo oli kilim i ded plante handred man we oli no gat bisnes nating long faet ya. Oli kilim i ded ol woman, ol pikinini, mo ol olfala man. Be makemgud defren tingting blong tufala soldia ya. Faswan soldia i harem nogud tumas from samting we hem i bin mekem. Be seken soldia, i tingting se samting we hem i mekem i stret nomo. ?Olsem wanem tufala man ya we oli joen long semfala trabol, oli save gat tingting we i defren long narawan?
Ansa blong kwestin ya i joen wetem tingting we i stap jajem yumi—wan paoa we God i givim blong mekem yumi naf blong skelem yumi wan mo blong jajem ol fasin mo ol tingting we oli pusum yumi. Tingting we i stap jajem yumi, hem i wan filing insaed long yumi we i mekem yumi haremsave taem yumi mekem i gud mo taem yumi mekem i nogud.
Sam man, taem oli mekem disisen, oli folem olfala waes tok ya se: “Letem tingting we i stap jajem yu i lidim yu.” Be sore tumas, man i no save dipen oltaem long tingting we i stap jajem hem. Yes, plante man we oli agri mo oli joen tu, long sam fasin we oli nogud, tingting blong olgeta i no stikim olgeta nating. (Jon 16:2; Ol Wok 8:1) Samuel Butler, wan man Engglan we i stap raetem ol buk, i talem se, tingting we i stap jajem yumi bambae “i no moa jajem man we i no wantem harem hem.”
?Yu yu save trastem tingting ya we i stap jajem yu? Ansa i dipen bigwan long fasin we yu folem blong trenem tingting blong yu. Nekis haf bambae i soem samting ya.
[Foto Credit Line Blong Pija Long Pej 3]
Upper war scene: U.S. Signal Corps photo