Ol Saen We Oli Soem Rod Blong Laef

?SIPOS yu stap wokbaot long wan rod we yu no savegud, bambae yu luk ol saen long rod olsem samting we i blokem yu? !No gat! I sua se bambae yu luk olgeta olsem samting we i save givhan long yu blong folemgud rod blong kasem ples ya we yu wantem go long hem.

Be, ?olsem wanem taem yumi stap wokbaot long rod blong laef? ?Yumi save folemgud rod ya sipos i no gat saen blong soem stret rod long yumi? No gat. Wan profet blong God bifo, i luksave se man i no naf blong jusum prapa rod blong hem. Profet ya i talem se: “O MASTA, mi save, se man hem wan i no save jusum rod blong hem; mo man i no save bos long laef blong hem tu.”​—Jeremaea 10:23, The New English Bible.

Nao, ?weples yumi save faenem ol advaes we yumi nidim blong livim yumi? Man ya we i wokem ol man i givim ol advaes we yumi save trastem, mo long Baebol, yumi save faenem ol tok blong lidim yumi we oli olsem saen blong rod. Jeova i talem long Tok blong hem se: “Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong [Mi] biaen long yufala, i talem se, ‘Hemia rod. Yufala i folem.’”​—Aesea 30:21.

Yes, Tok blong God i givim advaes we yumi save trastem blong lidim evri haf blong laef blong yumi. (Aesea 48:17; 2 Timoti 3:​16, 17) Be sore tumas, bighaf blong ol man oli jusum blong folem prapa rod blong olgeta, oli no wantem folem rod we God i soem. (Matiu 7:​13) !Nating se i olsem, ol saen blong rod oli stap yet long ples blong olgeta! ?Bambae yu respektem ol saen ya taem yu stap wokbaot long rod blong laef?