Yumi Ol Katolik, Yumi Save Lanem Plante Samting From Olgeta”

WAN tija long haeskul blong Bari, Itali, i talemaot tok ya long saed blong Ol Witnes blong Jeova taem hem i stap holem wan kos long saed blong histri blong ol jos. Tija ya i bin talem se hem i wantem yusum ol video kaset blong givhan long hem long kos ya. Taem Roberto, wan long ol studen, we i gat 18 yia, i harem samting ya, hem i askem sipos oli save tokbaot skul blong hem long kos ya. Hem i givim long tija video kaset ya: Jehovah’s Witnesses​—The Organization Behind the Name. Tija i agri, mo samwe 30 studen long klasrum oli wajem kaset ya. Roberto i talem se: “Evriwan i sapraes tumas long fasin joengud, ogenaesesen, mo dip lav blong ol Witnes blong Jeova. Oli sapraes moa taem oli kasem save se Sosaeti i prentem 40 milyan Wajtaoa mo 36 milyan Wekap! evri manis.”

Afta we oli wajem kaset ya, sam studen oli talem long Roberto se: “Mifala i no save se yufala i wok folem gudfala plan olsem.” Blong tokbaot ol Witnes blong Jeova, tija ya i talem long ol studen se: “Luklukgud olsem wanem bilif blong olgeta i pusum olgeta blong joengud tugeta mo wok folem plan. Yumi ol Katolik, yumi save lanem plante samting from olgeta.” Kaset ya mo ol storeyan we oli kamaot afta long kos ya oli mekem se plante oli kasem save moa long ol Witnes blong Jeova.