“?Hu i Putum Fasin Waes Long Ol Klaod?”

“TAEM yufala i luk we ol klaod oli stap hivap long wes, wantaem nomo yufala i save talem se, ‘Bambae i ren ya,’ mo bambae i olsem. Mo taem yufala i harem we saot win i stap blu, yufala i save talem se, ‘Ei, bambae i hot tumas,’ mo bambae i olsem.” Ol tok ya blong Jisas, we Luk i bin raetem long Gospel blong hem, oli soemaot fasin blong talemaot weta, long Palestaen blong bifo. (Luk 12:54, 55) Samtaem, ol man blong bifo oli naf blong luksave ol saen mo talem stret se weta bambae i olsem wanem.

Tede, ol man blong talem weta oli yusum spesel mesin, olsem satelaet, Doppler radar, mo ol bigfala kompyuta blong faenemaot se weta bambae i olsem wanem long olgeta dei we oli kam. Be plante taem, samting we oli talemaot i no kamtru. ?From wanem?

Plante defren samting i mekem se i no isi blong talemaot stret se weta bambae i olsem wanem. Eksampel, tempraja i save jenis, wora we i stap long win, presa blong win, mo spid blong win mo rod we hem i folem, ol samting ya oli save mekem se i had wok blong talem weta. Antap long samting ya, i gat wok we san, ol klaod, mo solwota, oli mekem tugeta. Kam kasem naoia ol man blong sayens oli no gat klia save long olgeta samting ya yet. Taswe, fasin blong talem weta bifo we hem i kamaot, i wan sayens we i save rong.

Save blong man long saed long weta i smol tumas. Samting ya i mekem yumi tingbaot ol kwestin we God i askem long Job: ‘?Olsem wanem? ?Wota blong naet i gat papa blong hem? ?Aes i gat mama blong hem? . . . ?Yu yu save tok long klaod, blong i mekem ren i foldaon, gogo yu wetwet olgeta? . . . ?Hu i putum fasin waes long ol klaod, no hu i givim save long ol samting we i hapen long skae? ?Hu i waes gud, we i save kaontem ol klaod long skae, mo hu i save kafsaedem olgeta blong ren i folfoldaon?’​—Job 38:28-37.

Ansa long ol kwestin ya i kamaot long Jeova God nomo, i No long man. Yes, nating se man i waes olsem wanem, fasin waes blong Man We i Wokem yumi, i hae we i hae moa long olgeta. Tru ya, God i rili soem lav taem hem i givim waes fasin blong hem long yumi, tru long Baebol. Olsemia, rod blong yumi i save win long olgeta samting we yumi mekem.​—Proveb 5:​1, 2.