Lav We i Strong Moa i Bitim Lav Blong Wan Mama

LONG ol stesen blong tren, long ol toelet no ol rod we i fulap long man, sam mama oli lego bebi blong olgeta we i jes bon. Samtaem, ol man blong pikimap tin doti oli faenem ol smol bebi insaed long ol doti ya. Ol bebi ya oli no moa gat paoa from we oli bin krae longtaem from mama blong olgeta. Niuspepa ya O Estado de S. Paulo, i talem se “namba blong ol bebi we ol woman oli lego long rod, i kam antap bigwan.” I tru se, maet wan yangfala mama i sore from samting we hem i bin mekem. Be hem i gohed long tingting blong hem nating se pikinini blong hem i save ded from.

Ating yu askem se: ‘?Olsem wanem wan mama i save gat wan tingting olsemia blong lego bebi blong hem mo spolem fiuja blong hem?’ Baebol i yusum nogud fasin ya, blong soemaot se filing we Man ya we i wokem yumi i gat long ol man blong hem, i defren olgeta: “?Woman i save fogetem pikinini blong hem? ?Yufala i ting se hem i save tanem baksaed long pikinini blong hem, we hem wan i bonem? Maet i gat woman we i save mekem olsem, be mi bambae mi no save mekem olsem long yufala samtaem.”​—Aesea 49:15.

Yes, lav we God i gat long yumi i dip moa bitim lav blong wan mama. God i soem se hem i kea long yumi taem hem i givim olgeta samting we yumi nidim. Nating se yu wan yangfala no yu bigman finis, nomata wanem kaen trabol yu kasem, yu no stap yu wan. Man we i wokem yu i wantem givhan long yu mo hem i wantem tumas se yu yu harem gud. Tok blong man we i raetem Ol Sam i talem se: “Hae God. Papa mo mama blong mi, maet tufala i save lego mi, be yu, oltaem nomo bambae yu stap lukaot gud long mi.”​—Ol Sam 27:10.

Long olgeta ples blong wol, Wajtaoa mo Wekap! oli stap givim save blong “tru God,” Jeova, mo Pikinini blong hem, Jisas Kraes. Olgeta we oli wantem tekem save ya, bambae oli go kasem laef we i no save finis.​—Jon 17:3.