“Longfala Olsem Wan Sida Long Lebanon”

LONG ol naes hil blong Lebanon, i gat sam tri oli gru we oli kolem olgeta Ars Ar-rab, minim “sida tri blong Masta.” Olgeta tri ya oli grin oltaem mo oli bigfala, mo bifo, oli kavremap hil ya olgeta. Baebol i tokbaot tri ya 70 taem, bitim eni narafala tri.

Baebol i talem se ol bigfala tri ya sida blong Lebanon oli “nambawan” mo oli “longlongfala.” (Sing blong Solomon 5:​15; Esikel 17:23) From we sida i longfala mo hem i strong wud we i stap longtaem, ol man oli laekem wud ya blong wokem haos mo bot, mo ol narafala samting olsem kabod insaed long haos tu. Smel mo kala blong hem we i red, ol man oli laekem tumas tu. Mo melek blong tri ya i strong, mekem we hem i no save rotin kwik mo ol bebet oli no save kakae hem tu. Ol tri ya oli rili bigbigfala, oli mama blong tri. Oli kasem 37 mita hae mo 12 mita raon long hem, mo rus blong hem i dip mo strong. Yumi no sapraes we sam man blong lukaot long ol tri oli talem se hem i “olsem hat blong king antap long ol narafala tri.”

Long Baebol, Esikel i mekem profet tok, se Mesaea bambae i olsem top blong wan sida, we God nomo i brekemaot mo i planem. (Esikel 17:22) Mo long lanwis hibru, tok ya sida i gat stamba mining se “i strong.” Tede, ol man blong Mesaea, Jisas Kraes, olgeta tu oli mas “stanap strong long bilif, . . . oltaem tingting blong [olgeta] i mas strong,” olsem wan longfala sida we i gru. (1 Korin 16:13) ?Olsem wanem blong kam olsemia? Yumi mas blokem ol fasin we oli no stret long ol Kristin, stanap strong long stret fasin mo obei long God oltaem. Olgeta we i mekem olsem, Baebol i talem se “ol man we fasin blong olgeta i stret, . . . bambae oli gru olsem ol sida ya long Lebanon.”​—Ol Sam 92:12.