Ripot Long Wok Blong Kingdom
Fasin Blong Lukaot Trufala God i Karem Blesing
LONG ol yia 900 B.K.T., tufala laen blong Kingdom blong Juda i fulap long giaman wosip. Be, long taem ya we plante man oli stap wosipim ol aedol, i gat wan man we hat blong hem i stret long fes blong God. Nem blong man ya, Jeosafat. Profet Jehu i tokbaot Jeosafat hem i se: “I gud we i gat samfala samting we yu stap mekem we oli gud . . . Mo yu stap traehad blong mekem ol samting we Hae God i wantem.” (2 Kronikel 19:3) Sem mak tede, “laef long wol ya i kam strong tumas,” be plante taosen man oli “stap traehad” blong lukaot trufala God, Jeova. (2 Timoti 3:1-5) Wan ekspiryens long saed ya i hapen long Togo long Wes Afrika.
Casimir i go long wan skul blong Katolik joj mo taem hem i gat naen yia, hem i mekem faswan komunyon blong hem. Be taem hem i kasem 14 yia, hem i no moa go long joj. From we hem i no moa go long lames, hem i fraet oltaem se bambae hem i go long helfaea, no maet long pegatri.
Long skul, Casimir i joen wetem wan grup blong yangfala we oli stadi Baebol wan taem evri wik. Mo tu, hem i stat blong ridim Baebol hem wan. Wanwan taem, Casimir i ridim buk blong Revelesen we i stap tokbaot wan wael anamol we i kamaot long solwota. (Revelesen 13:1, 2) Taem hem i askem sam kwestin long saed ya, man we i lidim Baebol stadi grup blong olgeta i talem se wael anamol ya i rili laef i stap, mo klosap nao bambae hem i kamaot long solwota. Ansa ya i mekem tingting mo filing blong Casimir i trabol tumas from we hem i laef klosap long solwota blong Atlantik. Hem i sua se wael anamol ya bambae i kakae hem.
Casimir i stat blong sevem sam mane blong ronwe i go long not blong drae ples blong stap longwe long wael anamol ya. Hem i talemaot plan blong hem long wan fren long klas. Fren ya we i wan Witnes blong Jeova, i eksplenem gud se wael anamol ya i no wan trufala anamol we i mas kamaot long solwota. Smoltaem biaen, fren blong Casimir i askem hem blong kam long ol miting blong Haos Kingdom. Casimir i glad mo hem i kam oltaem. Mo tu, hem i akseptem wan Baebol stadi.
Taem Casimir i gohed gud long stadi blong hem, famle blong hem i stat blong agensem hem. Famle blong hem i wosipim ol bubu blong olgeta mo oli stap kakae ol haf mit we blad i stap long hem yet, we ol man oli stap yusum blong mekem sakrefaes. Taem Casimir i eksplenem wetem respek mo kwaet fasin, from wanem hem i no save kakae mit ya, famle i tok strong long hem mo i talem long hem blong livim haos. Casimir i stap kwaet, mo oli no mekem wan samting. Be, long tri manis, famle blong hem i gat mit ya nomo blong kakae long tebel. Casimir i hanggri samtaem, be hem i winim problem ya, mo sam narafala traem bakegen.
Casimir i gohed gud long saed blong spirit go kasem we hem i tekem baptaes. Biaen, hem i kam wan man blong givhan, mo i joen long namba fo klas blong Ministeriol Trening Skul long Togo. Tede, hem i glad blong stap wok long Betel.
Yes, ol tok blong King Deved oli tru tumas taem hem i talem se: “Sipos yu girap, yu lukaot [Jeova], bambae hem i glad blong tekem yu.”—1 Kronikel 28:9.
[Tok Blong Pija Long Pej 8]
Casimir (long raetsaed) i glad blong stap wok long Betel