Wan Smol Aelan We i Stap Farawe

BLONG tokbaot aelan blong Sen Helena, plante taem ol man oli yusum defren tok olsem “smol” mo “farawe.” Samting ya i tru tumas long saed blong aelan ya, from we hem i longfala olsem 17 kilometa, hem i bigwan olsem 10 kilometa, mo hem i stap 1,950 kilometa saot-wes long kantri blong Afrika. Taem Napoléon Bonaparte i lus long faet, oli sanem hem i kam kalabus long aelan ya long 1815, mo hem i stap long ples ya gogo kasem we hem i ded.

Taem yu stap long solwota mo yu lukluk i go long Sen Helena, hem i luk olsem wan strong kalabus we yu no save kamaot long hem. Aelan ya i wan bigfala volkeno we tede, hem i no moa faerap. Ol hil blong hem we i kamaot stret long solwota blong Atlantik, oli hae olsem 500 go kasem 700 mita. Long medel blong aelan ya i gat wan bigfala hil, we nem blong hem Aktaeon. Hil ya i hae olsem 818 mita. From we win blong Saot Atlantik mo solwota oli pastru long aelan ya, weta blong hem i no hot tumas mo i naes. Long ol flatples raonabaot long solwota, i go kasem antap long ol bigfala hil, weta i jenis oltaem mo i gat plante defren kaen tri mo flaoa.

Sen Helena i stap long han blong Briten kam kasem en blong ol yia 1700. Ol man we oli laef long aelan ya oli kam long Yurop, Esia, mo Afrika. Oli no plante tumas, i gat bitim 5,000 man nomo. Ol man oli toktok lanwis blong engglis long ful aelan, be fasin blong toktok blong olgeta i defren. I no gat epot. Taswe, i gat wan rod nomo blong kasem ol man long narafala ples, hemia long bot we i stap go oltaem long Saot Afrika mo Engglan. Mo tu, wetem help blong wan satelaet, faswan program blong televisin i kasem aelan blong Sen Helena long 1990.

Long stat blong ol yia 1930, gud nius blong Kingdom blong God i kasem smol aelan ya. (Matiu 24:14) Evri yia, plante manples oli akseptem trutok olsem wan sas samting we i moagud i bitim ol rij samting. (Matiu 6:​19, 20) !Tede, ripot blong ol Witnes long Sen Helena i beswan long ful wol, from we i gat 1 pablisa blong evri 31 man!

[Map Blong Pija Long Pej 24]

(Lukluk niuspepa)

Sen Helena

JEMESTAON

Levelwud

AFRIKA

SOLWOTA BLONG ATLANTIK

Sen Helena