Oli Yusum Nem Blong God Bakegen

LONG plante yia no maet plante handred yia, ol man oli karemaot nem ya Jeova long Baebol. Be i gat wan Kristin skul nomo, ol Witnes blong Jeova tede, we oli stanap strong mo yusum bakegen tetragrammaton.”a

Ol tok ya we oli stap antap, oli kamaot long buk ya Jeová dentro do Judaísmo e do Cristianismo (Jeova long skul blong ol man Jyu mo long Kristin skul), we wan man Brasil, nem blong hem Assis Brasil, i raetem. Be wan kwestin i kamaot se, ?From wanem ol narafala skul oli karemaot nem blong God long Baebol blong olgeta? Mr. Brasil i talem se: “Oli karemaot nem blong God from giaman bilif . . . , oli folem prapa risen blong olgeta, no oli wantem tumas blong leftemap nem blong Jisas mo mama blong hem Meri.”

Be, Mr. Brasil i talemaot se: “Oli stretem fasin blong karemaot nem blong God long lanwis Potugal wetem New World Translation of the Holy Scriptures.” ?Olsem wanem? Oli putumbak nem blong Jeova long stret ples blong hem long Baebol ya. Nem ya Jeova i stap bitim 7,200 taem long New World Translation.

Stat long faswan taem we oli prentem Baebol ya, oli seremaot moa long sikis milyan faef handred taosen kopi blong Baebol ya long lanwis Potugal. Taswe wan man blong raetem niuspepa long Brasil, Diário do Nordeste (Not Is Niuspepa) i askem se, “?Yu yu save se God i gat wan nem?” From Baebol ya, long taem blong yumi plante milyan man oli save ansa, “Yes. Nem blong God hem i Jeova.”

[Futnot]