Gavman i Presem Ol Witnes

LONG Kadis, Spen, wan taon we i stap samwe long 500 kilometa saotwes long Madrid, mea Doña Teófila Martínez i givim wan presen (we hem i stap long pija antap) long ol Witnes blong Jeova. Oli raetem long presen ya se: “Taonhol blong Kadis i talem tangkiu long ol Witnes blong Jeova from fasin joen mo hadwok we oli mekem long taon ya.” ?Ol Witnes oli mekem wanem blong kasem ona ya?

Taonhol i givim presen ya long ol Witnes from we hem i luksave wok we olgeta oli mekem blong fiksimap wan haf blong Stad blong taon ya. Plante handred Witnes oli bin rere blong givim taem blong olgeta blong kam long sam wiken mo mekemgud ol toelet long Karansa Stad. Hemia wan bigfala stad we ol man oli plei futbol long hem. Naoia, olgeta we oli yusum Stad ya, oli save glad from ol niufala paep blong wota mo niufala floa we ol Witnes oli putum.

Long sam yia finis, ol Witnes blong Jeova oli joengud wetem ol man blong taon ya Kadis. Wan taem evri yia, taonhol ya i kaengud blong letem ol Witnes oli yusum Karansa Stad blong mekem Distrik Asembli blong olgeta. Taswe, ol Witnes oli glad blong mekem sam wok we i givhan blong mekem Stad i stap gud oltaem.

Antap long ol wok ya we oli mekem wanwan taem, ol Witnes blong Jeova oli stap visitim ol man long taon ya, blong givhan long olgeta long wan narafala rod. Oli stap talemaot “gud nius” blong Kingdom blong God. Be, oli no mekem minista wok blong olgeta long pablik blong man i presem olgeta from. Oli mekem wok ya from we oli obei long oda blong Jisas blong talemaot ‘gud nius blong Kingdom’ mo blong ‘go long ol man long olgeta ples long wol, blong pulum olgeta oli kam man blong hem.’ (Matiu 24:14; 28:19) Long rod ya, ol Witnes blong Jeova oli hop se oli save givhan long ol man long taon ya, taem oli tijim olgeta long ol “fasin we i stret.”​—Ol Proveb 12:28.