Hem i Blokem Fasin Nogud

KING, ?From wanem yu letem dog ya i stap tok nogud long yu olsem? ?Yu save letem mi mi go katemaot hed blong hem?” Man we i tok olsem hem i Abisae, wan kapten blong ami blong Isrel. Hem i kros long wan man Benjamin we nem blong hem Simei, we i jes sakem tok nogud long King Deved.​—2 Samuel 16:5-9.

Abisae i folem wan tingting we plante man tede oli stap folem tu. Tingting ya, se man i rere blong givimbak long narafala man long sem fasin nomo we man ya i mekem. Yes, Abisae i wantem panisim strong Simei, from hem i tok nogud long Deved.

?Olsem wanem nao long Deved? ?Hem i mekem wanem? Hem i blokem Abisae, i se: “!Yufala i letem hem i gohed!” I tru we Deved i save we olgeta poen we Simei i stap talemaot long hem oli giaman. Be hem i no wantem givimbak, nao wetem tingting daon hem i blokem fasin ya. Hem i letem bisnes ya i stap long han blong Jeova nomo.​—2 Samuel 16:10-​13.

Long taem ya, Deved i stap ronwe long pikinini blong hem we i wantem kam king long ples blong hem. Biaen, hem i kasem paoa blong hem bakegen olsem king. Ale, Abisae tu i kam wantaem blong welkam long hem mo askem fogif long hem. Bakegen, Abisae i wantem kilim hem i ded, be Deved i no letem hem.​—2 Samuel 19:15-​23.

Long stori ya, Deved i soemaot we hem i rili olsem wan gudfala pija blong Jisas Kraes, from we aposol Pita i talem long saed blong Jisas, se: “Taem ol man oli tok nogud long hem, hem i no tok nogud long olgeta. . . . Hem i putum tingting blong hem i stap strong long God, we i stap jajem ol man long stret fasin.”​—1 Pita 2:​23.

Tede, Baebol i talem long ol Kristin tu, se: “Tingting blong yufala i [mas] stap daon. Sipos man i mekem i nogud long yufala, bambae yufala i no givimbak long hem bakegen. Taem man i tok nogud long yufala, bambae yufala i no tok nogud long hem bakegen.” (1 Pita 3:​8, 9) Sipos yumi folem rod blong Deved mo Jisas Kraes, bambae yumi tu ‘yumi holemstrong ol stret fasin blong yumi, blong winim ol rabis fasin.’​—Rom 12:17-​21.