Raf Fasin—!I No Longtaem Bambae Hem i Lus Blong Olwe!
“Raf Fasin i Spolem Nesen”—The New York Times, Yunaeted Stet.
“Raf Fasin Insaed Long Famle”—O Globo, Brasil.
“Raf Fasin i Kasem Olgeta Woman Blong Wol”—The Globe and Mail, Kanada.
OL TOK ya, we oli kamaot long ol niuspepa blong Not mo Saot Amerika, oli soemaot wan fasin we i stap kam antap long fulwol mo we i mekem yumi trabol. Olsem Wol Helt Ogenaesesen i talem i no longtaem, “ol defren kaen raf fasin oli kam antap bigwan long ol yia we oli jes pas.”
Tingbaot sam long ol ripot ya:
Fasin blong kilim narafala i ded. Long Latin Amerika mo ol aelan blong Karibin, evridei i gat samwe 1,250 man i ded from sam raf fasin we narafala i mekem long olgeta. Taswe, “long haf blong Latin Amerika mo Karibin, fasin blong kilim narafala i ded i kam namba tu samting we i mekem se plante yangfala we oli gat 15 kasem 24 yia, oli lusum laef blong olgeta.”
Raf fasin agensem pikinini. Long fulwol, ol pikinini oli safa from ol man we oli spolem olgeta long saed blong bodi, mekem nogud wetem olgeta long saed blong seks, mo spolem filing blong olgeta. Wan eksampel, “long plante defren kantri we ol man oli gat bigfala save blong mekem plante samting, ol stadi oli soem se i gat 10 kasem 15 pesen blong ol pikinini we oli trabol tumas from we man i mekem nogud long saed blong seks wetem olgeta—bighaf blong olgeta oli ol gel.”
Raf fasin agensem ol woman. Sam man oli traem faenem olsem wanem man i no bin respektem ol raet blong narafala man long fulwol long 1997. Oli faenem se “long klosap evri kantri, stamba samting we i mekem ol woman oli kasem kil hemia raf fasin insaed long famle.” (Human Rights Watch World Report 1998) Raf fasin we i kamaot insaed long famle i stap hapen long plante ples, be ol man oli no tokbaot trabol ya. Taswe, oli talem se hemia “bigfala trabol blong ol yia 19 handred, we man i no tokbaot.”—The Globe and Mail, Kanada.
Long taem blong Noa tu, ol man “olbaot long evri ples, oli stap faet, mo oli stap kilim man i ded.” (Jenesis 6:9-12) Be Jeova God i sevem “Noa we i wan prija we i stap talemaot stret fasin” mo famle blong hem, taem hem i “letem wota i kam bigwan, i draonem ol narafala man ya we oli no obei long hem.” God bambae i mekem sem mak long taem blong yumi. Bambae hem i sevem “ol man we oli bilif long hem” taem hem i sakemaot ol rabis man we oli raf tumas, mo hem i jenisim wol ya i kam wan paradaes, long niufala wol ya we hem i promes long yumi. (2 Pita 2:4-9; 3:11-13) ?Yu yu glad tumas blong save se i no longtaem bambae raf fasin i lus?