Holemtaet Gudnem We Yu Gat

YUMI save harem gud tumas taem yumi luk wan naesfala pija we wan man i pentem. Sipos yumi kam klosap long pija ya, bambae yumi luk we man ya i pasem penbras plante handred taem blong putum ol defdefren kala long kaliko ya.

Long sem fasin, yumi no wokem wan gudnem from wan samting nomo olsem wan bigfala mak blong penbras. Be yumi wokem wan gudnem from plante smosmol samting we yumi mekem long ol taem we oli pas. Yes, from ol gudfala wok we yumi mekem sloslou yumi kasem wan gudfala nem.

Be defren olgeta nao, sipos man ya blong pentem pija i mestem wan taem nomo wetem penbras, hem i save spolem pija ya. Hemia i sem mak long saed blong gudnem blong yumi. Waes King Solomon i talem se: “Sam man oli stap spolem laef blong olgeta long ol rabis fasin blong olgeta.” (Ol Proveb 19:3) Wan smol samting nomo​—olsem sipos yumi faerap bigwan long kros, yumi dring alkol bitim mak, no yumi mekem rabis fasin long saed blong seks​—i save mekem gudnem blong yumi i kam doti. (Ol Proveb 6:32; 14:17; 20:1) Taswe i impoten tumas we yumi traehad blong gat wan gudnem mo wok strong blong holem gudnem ya.​—Skelem wetem Revelesen 3:5.