Samting We i Moagud i Bitim Fasin Blong Mekem Fes i Naes
AFTA we hem i tokbaot “ol samting” we wan woman i save yusum blong mekem se hem i kam moa naes, aposol Pita i givim advaes ya se: “I moagud yu naes insaed long hat blong yu, i moagud yu gat ol naesfala fasin we oli no save lus samtaem, olsem fasin we i kwaet mo i kaengud, hemia nao samting we i impoten tumas long ae blong God.”—1 Pita 3:3, 4, Today’s English Version.
Yumi intres tumas blong luk se, taem aposol Pita i raetem advaes ya, hem i yusum Grik tok ya koʹsmos, we i stamba blong tok ya “kosmetik” long Engglis, mo we i minim fasin blong “mekem i kam naes, antap moa long saed blong fes.” ?Pita i wantem putum tabu long ol Kristin woman we oli yusum ol samting blong mekem olgeta oli kam moa naes? I no gat wan vas long Tok blong God we i talem samting ya. Be, Tok blong God i letem ol Kristin oli fri blong mekem prapa disisen blong olgeta, taswe i sua se bambae i gat ol defdefren fasin we ol woman oli save folem long saed ya.
Be, sipos yumi bitim mak long fasin blong pentem ae, nao yumi pulum man blong tokbaot yumi, ?yumi stap soemaot wanem long narafala? Ating yumi stap soem se man i save plei wetem yumi, yumi no gat kwaet fasin, yumi no kea long narafala, yumi flas, mo yumi tingbaot yumi wan nomo. Yes, hemia i save spolem lukluk blong wan woman, mo ating i mekem ol man oli gat rong tingting long saed blong ol fasin blong hem.—Lukluk Esikel 323:36-42.
Sipos wan woman we i ‘stap talem se hem i lavem God,’ hem i luksave ol samting ya bambae hem i traehad blong soemaot long fes blong hem se hem i wan woman we i gat ol gudfala fasin, olsem fasin blong skelem gud ol samting, kwaet fasin, fasin kaengud mo tingting daon. Ol gudfala fasin ya bambae oli leftemap hem. Yes, wan woman olsem, bambae i soem se hem i naes long saed blong ol fasin blong hem mo insaed long hat blong hem, nomata sipos hem i yusum ol samting blong mekem fes blong hem i naes no nogat. Folem ol tok we Pita i bin talem bifo, wan woman olsem i soem se hem i kasem save se i gat wan samting we i moagud i bitim fasin blong mekem fes i naes.—1 Timoti 2:9, 10.