Oli Talem Nem Blong God Long Isrel

LONG plante handred yia, skul blong ol man Jiu i putum ol strongfala rul blong blokem ol man long skul blong olgeta blong oli talem nem blong God, Jeova. Folem tok we i kamaot long Misna, eni man we i talem nem blong God bambae i “no gat ples blong hem long niufala wol we i kam.”​—Sanhedrin 10:1.a

Long Janewari 30, 1995, wan Sefadik we fastaem hem i jif rabae blong Isrel, i talemaot nem blong God. Hem i mekem samting ya taem hem i talem taekun, hemia wan prea blong Kabal skul we prea ya oli yusum blong stretem ol samting. Ol man blong skul ya oli bilif se ol rabis spirit oli bin spolem fasin joengud we i stap bitwin heven mo wol, taswe long prea ya oli stap askem God blong i karem fasin joengud ya i kam bakegen. Wan niuspepa, Yedioth Aharonoth, blong Febuwari 6, 1995, i talem se: “Prea ya i gat bigfala paoa, taswe ol tok blong hem oli stap long wan spesel buk we oli no stap salem long ol stoa.” Taem ol man we oli talem prea ya oli yusum nem blong God, oli ting se nem ya bambae i givim spesel paoa long wanem we oli askem.

I gud blong makem se, Baebol i givim oda long ol man blong God blong oli yusum nem blong Hem, Jeova. (Eksodas 3:​15; Ol Proveb 18:10; Aesea 12:4; Sefanaea 3:9) Long faswan hanraet blong Hibru haf blong Baebol, nem ya i stap klosap 7,000 taem. Be, Baebol i givim woning long yumi blong no yusum nem ya long fasin we i no stret. Namba tri blong ol Ten Komanmen i talem se: “Bambae yufala i no mas yusum nem blong Jeova, God blong yufala, long fasin we i no stret, from we Jeova bambae i panisim man we i yusum nem blong hem long fasin we i no stret.” (Eksodas 20:​7, NW) ?Long wanem rod wan man i soem se hem i yusum nem blong God long fasin we i no stret? Wan buk (we Jewish Publication Society i prentem), i makem se Hibru tok ya we oli tanem i kam “fasin we i no stret,” i save minim “yusum olbaot nomo,” be tu hem i minim fasin blong “talem bakegen mo bakegen blong kasem wan blesing we i no rili impoten.”

From samting ya, ?wanem tingting we yumi mas gat long saed blong prea ya taekun, we skul blong Kabal i mekem blong stretem ol samting? ?Prea ya i kamaot olsem wanem? Bitwin ol yia 1100 mo 1200 K.T.,b wan skul blong ol man Jiu i stat kam antap. Skul ya, we oli talem se ol bilif mo fasin blong hem i haed, oli kolem Kabala. Long ol yia 1500, Isaac Luria, wan rabae, i statem wanem we oli kolem “ol taekun,” mo i joenem samting ya i go long ol prea blong Kabal. Oli yusum nem blong God olsem wan tok we i haed mo we i gat spesel paoa, mo nem ya i kam wan haf blong ol kastom blong skul ya Kabal. ?Yu ting se i stret blong yusum nem blong God long fasin olsem?​—Dutronome 18:10-​12.

Nomata olsem wanem yu ansa long kwestin ya, be yumi mas luksave se i no oltaem we long nesen blong Isrel tede, ol man oli talem nem blong God. Yes, God hem wan i talemaot se: “Mo tru, long taem ya bambae yufala i talem se: ‘Yufala i talem tangkiu long Jeova. Yufala i singaot long nem blong hem. Yufala i talemaot ol fasin blong hem long ol laen blong man. Yufala i talemaot samting ya se, ol man oli mas leftemap nem blong hem. Singsing long Jeova, from we hem i mekem ol samting long fasin we i nambawan tumas. Samting ya, ol man oli talemaot long olgeta ples long wol.’”​—Aesea 12:​4, 5, NW.

Yes, long Isrel, mo long bitim 230 narafala kantri long wol, ol Witnes blong Jeova oli traehad blong givhan long ol man raonabaot long olgeta blong oli kasem stret save blong Jeova. Oli hop se bambae i gat moa man we oli glad blong kasem mining blong ol vas olsem Ol Sam 91:​14 (NW,) we i talem se: “From we hem i lavem mi [Jeova], bambae mi mi sevem hem. Bambae mi protektem hem from we hem i save nem blong mi.”

[Ol futnot]

[Tok Blong Pija Long Pej 28]

Long ples ya Negeb, ol man blong Jeova oli talemaot nem mo Tok blong hem

[Tok Blong Pija Long Pej 29]

Pija we i soem nem blong God