Wan Help Blong Jusum Ol Gudfala Fren

WAN ripot long buk ya Reader’s Digest i talem se ol yangfala oli laekem moa blong folem fasin blong ol fren blong olgeta long saed blong klos mo myusek, i bitim fasin blong papa mama blong olgeta. Taswe, i impoten tumas we ol papa mama oli save se ol pikinini blong olgeta oli stap fren wetem hu, mo oli stap go wea.

Esmé van Rensburg i wan woman blong hae save we i stap tij long wan yunivesiti blong Saot Afrika, long dipatmen we i stap stadi long tingting blong man. Hem i talem long ol papa mama se: “Hemia bisnes blong yu, blong lukaot gud long pikinini blong yu. . . . Maet bambae pikinini blong yu i kros long yu, be biaen filing blong hem i save jenis.” Ale, woman ya i givim sam advaes long ol papa mama. Ol rul we yu putumap oli mas gat mining mo oli mas stanap long ol stretfala loa. Lesingud long pikinini blong yu. No kam kros kwiktaem long olgeta, soem kwaet fasin, mo tingting gud long wanem we yu wantem talem long olgeta. Sipos pikinini blong yu i mekem fren finis wetem wan yangfala we i no stret, i moa gud blong makemaot ol nogud frut we oli save kamaot from fasin blong fren wetem yangfala ya, i bitim we yu jes talem se bambae hem i no moa save luk fren ya.

Longtaem finis i kam, Tok blong God, Baebol, i stap givim gudfala advaes we ol papa mama oli save folem. Eksampel, hem i talem se: “Yufala evriwan i mas rere oltaem blong lesin, be yufala i no mas hareap blong toktok. Mo yufala i no mas hareap blong kros.” (Jemes 1:​19) Mo tu, long saed blong fasin blong jusum gudfala fren, Baebol i talem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” (Ol Proveb 13:20) Tufala eksampel ya oli soem se i gat fulap waes tok i stap blong ol man we oli glad blong ridim Baebol mo we oli folem ol rul blong hem long laef blong olgeta evri dei.