“Sipos Sol i No Moa Konkon”

HEM i wan samting we ol man oli bin faet from. Ol man oli bin yusum hem blong pem ol samting. Long Jaena bifo, gol nomo i sas moa i bitim hem. Yes, longtaem i kam, ol man oli tingbaot sol olsem wan samting we i sas tumas. Kam kasem tede, ol man oli yusum sol olsem wan meresin mo blong kilim i ded ol jem. Mo raon long wol, oli yusum sol blong mekem kakae i tes gud mo blong kipim wan samting i stap longtaem.

From we sol i gud tumas mo yumi save yusum long plante defren rod, yumi no sapraes we Baebol i yusum hem plante taem olsem pijatok. Eksampel, Loa blong Moses i talem se olgeta samting we ol man oli givim olsem presen long olta blong Jeova, oli mas putum sol long hem. (Levitikas 2:​13) Hemia i no blong mekem ol sakrefaes ya oli tes gud moa, be maet sol i pija blong wan samting we i no save rotin no kam nogud.

Taem Jisas i givim Bigfala Tok blong hem antap long Hil, hem i talem long ol man blong hem se: “Yufala i olsem sol long ol man long wol.” (Matiu 5:​13) Long tok ya, Jisas i minim se taem ol man blong hem oli talemaot Kingdom blong God long ol narafala, samting ya bambae i gat paoa blong sevem laef blong olgeta we oli lesin. Yes, olgeta we oli folem tok blong Jisas, bambae oli no save kam nogud long saed blong fasin mo long saed blong spirit olsem ol man long ples we oli laef no oli wok long hem.​—1 Pita 4:​1-3.

Be, Jisas i gohed blong givim woning se: “Be sipos sol i no moa konkon, . . . Sol ya i no moa gud blong wan samting, i blong sakem nomo, blong ol man oli purumbut nomo long hem.” Albert Barnes, wan man blong stadi long Baebol, i talem se long taem blong Jisas mo ol aposol, sol “i no klin, hem i fulap long ol smosmol pis lif mo graon.” Taswe, sipos sol i no moa konkon, maet ol “narafala samting olsem graon mo lif” i stap long hem yet. Barnes i gohed blong talem se, “man i no moa save yusum blong mekem wan samting, be . . . blong sakem long rod, no long ples we man i wokbaot long hem, olsem waet graon.”

Ol Kristin oli mas lesin long woning ya, mo lukaotgud blong no lego wok blong prij no blong gobak long ol nogud fasin blong bifo. Sipos no, bambae oli kam slak long saed blong spirit, nao oli kam olsem we oli gud blong nating nomo, olsem ‘sol we i no moa konkon.’