“Stanap Strong From Bilif”

PLANTE oli presem wan niufala Franis buk we i kamaot long 1998, nem blong hem Les Témoins de Jéhovah face à Hitler, we Guy Canonici i raetem. Long fastok blong buk, François Bédarida, wan Franis man we i stadi long histri mo we ol man oli tinghae long hem, i raetem se: “Buk ya i welkam. Hem i kavremap wan haf blong histri we ol man oli no save, mo antap long samting ya, hem i kam long stret taem blong hem. . . . Wanwan man blong histri nomo oli save long laef blong ol Witnes blong Jeova aninit long rul blong ol Nasi. Be, olwe long ol 12 yia ya we ol man Nasi oli rul, ol Witnes oli kasem plante trabol we oli nogud we oli nogud. Olgeta tu oli go long ol rabis kalabus. Olgeta tu oli ded from bilif mo tijing blong olgeta. ?From wanem histri i fogetem ol Kristin ya? . . .

“?From wanem oltaem ol Nasi oli mekem i nogud tumas long wan smol grup olsem we olgeta oli stap wanwan olbaot long Jemani mo oli no mekem trabol? Hemia i narakaen. Taem yu skelem olgeta man blong Jemani wetem ol Witnes, oli no plante tumas​—namba blong wan ripot i soemaot se blong bitim 60 milyan man long Jemani, i gat 20,000 Witnes nomo long ful kantri​—be antap long samting ya oli man blong pis, oli respektem loa mo oli no spolem man. Wan samting nomo we oli wantem, hemia blong mekem wok blong olgeta, mo lukaotgud long ol pikinini blong olgeta. . . .

“Be bigfala trabol we oli mekem long olgeta, i no winim fasin blong olgeta blong stanap strong long saed blong spirit. Ol man ya oli bilif long Jisas Kraes, nao oli gat paoa insaed long olgeta blong stanap strong agens long raf fasin blong ol polisman. Yes, oli gat bigfala paoa, oli stanap strong go kasem ded.”

Ol Witnes blong Jeova oli safa go kasem ded from Kristin bilif blong olgeta, from we rabis gavman ya i no letem skul blong olgeta. Stori blong olgeta i save mekem man i sek. Wan impoten Franis Katolik niuspepa, La Croix, i tokbaot buk ya, i se: “Ol man oli no save histri blong ol Witnes blong Jeova. Taswe, Guy Canonici i hivimap fulap pruf we oli mekem ol man oli sapraes bigwan. I klia we ol bigman wetem ol pikinini oli stanap strong from bilif blong olgeta, samtaem go kasem we oli ded. Buk ya i save soemaot prapa fasin blong ol Witnes blong Jeova, we tede ol man oli no agri tugeta long saed blong olgeta, se oli Kristin no nogat.”