“Visit We Mi Mekem Long Haos Kingdom”

Tija long skul we Lauraa i go long hem, i askem olgeta studen blong go long sevis blong eni jos we olgeta nomo oli jusum, nao oli mas raetem wan ripot long saed blong samting we oli luk. Laura i jusum ol Witnes blong Jeova. Stamba tok we hem i raetem long ripot blong hem se, “Visit we mi mekem long Haos Kingdom.” ?Laura i faenem wanem samting long miting blong ol Witnes we i defren long ol narafala jos? Hemia sam long ol samting we hem i makem:

Ol pikinini: “Olgeta pikinini oli stap sidaon wetem ol bigman. Long olgeta jos we mi mi go long olgeta finis, ol pikinini oli no stap wetem ol papa mama blong olgeta be oli go long Sande Skul.”

Ol man blong defren kala oli joengud: “Plante taem, ol jos oli karem ol man blong sem kala nomo oli kam wanples. . . . Be, ol Witnes blong Jeova oli sidaon tugeta mo oli no seraot long ol smosmol grup.”

Gudfala welkam: “Plante man oli kam storeyan wetem mi. . . . Sam long olgeta oli askem long mi sipos i gat man we i stap mekem stadi blong Baebol wetem mi. Be, mi no harem se oli fosem mi. Oli . . . letem mi mi tekem prapa disisen blong mi.”

I no gat kleksin: “Wan samting we i mekem mi mi sapraes tumas hemia se i no gat kleksin. . . . Ol jos we mi go long olgeta finis, oli mekem kleksin tu long ol pikinini.”

I gat klosap 90,000 kongregesen blong ol Witnes blong Jeova long ful wol. ?From wanem yu no go visitim wan long olgeta we i stap klosap long yu?

[Futnot]