Winim Ol Traem Blong Papa Mama
WOK blong trenem ol pikinini tede, hem i wan bigfala wok blong ol papa mama, antap moa taem ol yangfala oli gat bitwin 13 mo 19 yia. Wan niuspepa blong Montreal long Kanada, The Gazette, i talem se fasin blong dring alkol mo tekem drag i kam “wan samting we olgeta yangfala oli stap mekem.” Niuspepa ya i talem strong se ol papa mama oli gat “responsabiliti blong stap wekapgud long ol jenis we i save hapen long yangfala [blong olgeta].”
?Olsem wanem ol papa mama oli luksave sipos ol yangfala blong olgeta oli stap kasem sam problem olsem? Oli mas lukluk ol jenis long saed blong bodi, filing, mo fasin blong olgeta taem oli stap wetem ol man. Hemia sam woning we wan Akademi blong Amerika, we i stap lukaot long ol pikinini mo ol yangfala, i faenemaot. Hem i se ol papa mama oli mas lukaot sipos ol yangfala blong olgeta oli taed longtaem, fasin blong olgeta i jenis, oli spenem tumas taem insaed long rum mo lokem doa blong olgeta, oli gat fasin agens, mo oli stap brekem loa.
?Olsem wanem ol papa mama oli save protektem pikinini blong olgeta long ol nogud samting ya mo ol nogud frut we oli kamaot from? Dokta Jeffrey L. Derevensky blong Yunivesiti blong McGill, i tingting se sipos papa mama i pulum pikinini blong i no fraet blong toktok wetem tufala mo sipos tufala i soem respek taem pikinini ya i smol yet, samting ya bambae i mekem se i no gat tumas problem oli kamaot long fiuja. The Gazette i gohed blong talem se, nating se ol yangfala oli wantem kam moa fri long yangtaem blong olgeta, be ol yangfala ya oli nidim yet se man i givim “ol advaes, help, ol rul mo lav blong papa mama blong olgeta.” Olgeta samting ya oli laenap wetem toktok we i stap long wan Proveb blong Baebol we i talem se: “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.” (Ol Proveb 22:6) God i givim advaes long ol papa mama se tufala i mas soem wan gudfala eksampel long ol pikinini, frengud wetem olgeta, toktokgud tugeta, mo tijimgud olgeta.—Dutronome 6:6, 7.