“?Olsem Wanem Blong Wekemap Ol Jos?”

KWESTIN ya i kamaot long wan niuspepa blong Katolik jos blong Franis, we nem blong hem Famille Chrétienne (Kristin Famle). Plante man oli no sapraes long kwestin ya. Wan haeman long jos blong Engglan, Kadinol Hume, i talem se ol jos oli olsem “ol bigfala man we oli stap slip nomo.” Blong wekemap ol jos ya, sam man oli ting se i gud blong wokem sam grup blong jos blong go prij long narafala. Wan pris blong Itali i tokbaot rod ya se hem i wan “niufala rod blong prij stret long ol man.” I tru se, pop i bin agri wetem tingting ya, be i no olgeta man evriwan we oli ting se oli mas serem bilif blong olgeta wetem narafala.

I no longtaem i pas, Pigi Perini, wan man we i lukaot long jos blong Milan, hem i go long Afrika. Long ples ya, wan sista blong Katolik Jos i talem long hem se: “Mi mi stap long ples ya 40 yia finis. Mo long olgeta yia ya, mi neva talemaot nem blong Jisas from we mi no wantem spolem kastom blong ol man Afrika.” From samting ya, Perini i talem stret se: “!Yumi no moa tokbaot Jisas, yumi no moa serem bilif blong Jisas, yumi no moa talemaot mesej blong ol gospel!” Be, i gat plante narafala man we oli luk wok ya blong talemaot gud nius olsem wan impoten haf blong laef blong olgeta. Wok ya i givhan long olgeta tu, blong stap wekapgud long saed blong spirit. Pigi Perini i luksave se: “Sipos yu luk tu man long maket we tufala i stap tokbaot Jisas Kraes no we tufala i stap holem Baebol long han blong tufala, wantaem nomo yu tingting se: !Yu luk, hemia ol Witnes blong Jeova ya!”

Plante milyan man oli laekem tumas blong toktok wetem ol Witnes blong Jeova long saed blong Baebol. I sua se, long eria blong yu ol Witnes oli gat plan tu blong halpem ol man blong stadi Baebol. Ol Kristin ya we oli wok strong, oli mekem sem mak long ol Kristin blong faswan handred yia. Oli leftemap tingting blong olgeta blong serem bilif blong olgeta wetem ol narafala man. Ples we olgeta oli mekem miting long hem (oli kolem Haos Kingdom) oli ol ples we ol man oli joengud mo oli frengud. I gud sipos yu yu go long wan long ol miting ya we ol Witnes blong Jeova oli mekem, blong luk olsem wanem blong blokem fasin ya blong slip long saed blong spirit.