Ol Man—?Oli Anamol We Oli Waes Moa?
“?Wanem we yumi bilif long saed blong stamba blong laef, i impoten?”
Wan gel Brasil we i gat 16 yia i askem kwestin ya long fastok long tok we hem i givim we stamba blong hem “Ol Man—?Oli Anamol We Oli Waes Moa?” Tija blong hem i singaot hem blong tokbaot kwestin ya long ol studen long klas, afta we tija ya i kasem wan kopi blong Wekap blong Jun 22, 1998, (long Inglis) we i tokbaot poen ya.
Yangfala Witnes ya i soemaot klia ol nogud frut we oli kamaot from tijing blong evolusen we i stanap long tingting ya se olgeta laef samting we oli strong moa oli laef longtaem bitim ol laef samting we oli no strong. Wan eksampel, plante man oli luksave se tijing blong evolusen i lidim sam man blong tingbaot ol faet olsem wan haf nomo blong traehad we man i mekem oltaem blong stap laef. Samting ya nao i mekem se ol tingting blong Fascism mo Nazism oli kamaot.
Studen ya i soem se ol man mo ol anamol, tufala i defren olgeta. Hem i talem se: “Ol man nomo oli save gru long saed blong spirit. Ol man nomo oli wantem traem faenem mining blong laef mo from wanem oli stap laef. Ol man nomo oli stap wari blong ded, oli stap tingbaot se oli stat olsem wanem, mo oli gat tingting ya blong wantem tumas blong laef foreva. !Taswe,i impoten tumas blong spenem taem blong faenemaot stamba blong laef blong yumi!”
Tija ya i presem gudfala tok ya we hem i mekem. Mo tija i talemaot se tok ya i nambawan from we yangfala Witnes i gat wan fasin blong laekem rid. Olgeta long skul oli save hem olsem wan gel we i laekem tumas blong ridim ol buk we oli stanap long Baebol olsem Wekap! mo Wajtaoa.
Ol Witnes blong Jeova oli rili wari long wanem we tijing blong evolusen i stap mekem long hat mo tingting blong ol yangfala. From samting ya nao, kongregesen we yangfala gel ya i joen long hem i enkarajem ol yangfala Witnes blong givim wan kopi blong Jun 22, 1998 Wekap! long ol tija mo ol fren blong olgeta long skul. Oli seraotem samwe long 230 magasin long ol defren skul long taon ya. Wan man we i hed blong Dipatmen blong Sayens long wan skul i mekem sabskripsen blong Wekap! magasin.
Yes, !wanem we yumi bilif long saed blong stamba blong laef, i impoten! Yangfala gel ya mo ol fren blong hem oli soem se bilif we oli gat long Man we i Wokem olgeta samting i rili mekem se laef blong olgeta i kam defren.