Papa Mama i Agensem Tija We i No Laekem Ol Man Blong Narafala Skul
Wan tija blong wan praemari skul long Cassano Murge, long Itali, i givim sam stika long ol studen blong hem blong oli tekem i gohom wetem olgeta. Ol stika ya, we oli mas putum long fored blong doa, oli gat toktok ya long olgeta se: “Mifala i Katolik. Mifala i askem ol Witnes blong Jeova blong no kilkilim doa ya.”
Sam long ol papa mama blong ol studen ya, nating se oli no Witnes blong Jeova, oli agensem strong ol aksin blong tija ya. Folem wanem we niuspepa ya Muoviti Muoviti i talem, ol papa mama oli talemaot se ‘fasin blong givim mesej olsem long ol pikinini i save mekem se ol pikinini oli agensem eni man we i no gat sem tingting olsem olgeta no i save mekem se oli ting nating long wan man we skul blong hem i “defren.” ’ Wan long ol papa mama ya i raet i go long niuspepa ya mo i talem se stika ya hem i “sid blong wan rabis gras, mo hem i kamaot from man we i no gat save mo i krangke.”
Olsem ripot ya i soem, plante man we oli gat stret tingting oli luksave denja we i save kamaot taem wan man i statem fasin ya blong no laekem narafala from we oli defren long hem. Oli gat respek long Kristin minista wok we ol Witnes blong Jeova oli stap mekem long Itali mo long ful wol. Yu save askem ol Witnes ‘from wanem oli putum tingting blong olgeta i stap long Kraes.’ Bambae oli glad blong tokbaot samting ya wetem yu, we oli mekem wetem ‘bigfala respek.’—1 Pita 3:15, NW.