Stap Tru Oltaem Long Jeova

NATING se fasin blong stap tru oltaem i no plante long wol tede, hem i wan fasin we i makem ol man blong trufala God, Jeova. Wan man we i stap tru oltaem i stanap strong long taem blong traem mo hem i holemstrong nating se ol yia oli pas. Tingbaot gudfala King Hesekia. Baebol i talem se: “I no gat wan king long Juda we i rul fastaem long hem no biaen long hem, we i olsem hem.” ?Wanem i mekem se Hesekia i defren long ol narafala king? “Hem i putum tingting blong hem i stap strong long Hae God,” nating se ol man raonabaot long hem oli mekem wosip long giaman god ya Molek. Yes, Hesekia “oltaem nomo i stap obei long [Jeova], mo i stap holemgud ol loa.”—2 King 18:1-6.

Aposol Pol i wan narafala man we i stap tru oltaem long Jeova. Stori blong minista wok blong hem we yumi faenem long Baebol i soem klia se Pol i gohed nomo blong mekem wok blong God wetem ful hat blong hem. Long taem we klosap laef blong hem i finis, Pol i save talem se: “Long laef blong mi we mi mi bilif strong long Kraes, i olsem we mi mi stap resis strong long wan resis, mo naoia mi mi kamtru finis long en blong hem, mo mi mi stap holemstrong yet fasin blong bilif.”—2 Timoti 4:7.

!Hesekia mo Pol, tufala i soemaot gudfala eksampel long fasin blong stap tru oltaem! I gud yumi folem fasin blong bilif blong tufala taem yumi stap tru oltaem long Nambawan God blong yumi, Jeova.—Hibrus 13:7.