?Hu Bambae i Finisim Ol Faet?
LONG Septemba 1999, Sekretari-Jenerol blong Yunaeted Nesen, Kofi Annan, i welkamem olgeta we oli kam long namba 54 Jenerol Asembli, wan miting we oli stap holem evri yia. Long niuspepa ya, The Toronto Star, Annan i talem wan strong tok long ol lida blong wol se: “Plante man tumas oli nidim we bigfala ogenaesesen blong wol i mekem wan samting blong givhan long olgeta, be i no jes blong toktok blong talem sore nomo. Ol man ya oli nidim wan ogenaesesen we i mekem trufala promes mo givhan long olgeta blong finisim ol faet, mo blong statem wan laef we oli gat plante samting.”
?Yunaeted Nesen mo ol kantri we oli joen long hem oli save “mekem trufala promes mo givhan” blong finisim ol faet? Insaed long semfala niuspepa ya, presiden blong Yunaeted Stet, Bill Clinton i talem se: “Afta we i gat tumas blad i ron long handred yia ya, yumi save se hem i isi nomo blong talem se ‘neva samting ya i save hapen bakegen,’ be i hadwok blong mekem ol tok ya i kamtru.” Hem i gohed, se: “Fasin ya we man i talem tumas promes be i no mekem, i save mekem man i harem nogud, i sem mak olsem we oli harem nogud taem narafala i no kea long olgeta.”
Bitim 2,500 yia bifo, profet Jeremaea i tokbaot traehad blong ol man se: “O Jeova, mi mi savegud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.” (Jeremaea 10:23, NW) ?Nao, i gat wan rod blong finisim ol faet?
Long Aesea 60:18, God i talem klia long yumi se: “Noes blong faet bambae i no moa save kamaot long kantri blong yufala. Bambae ol enemi oli no moa save kam blong spolem ples blong yufala.” Profet tok ya i kamtru wantaem finis, hemia long taem we God i mekem ol man blong hem we oli kalabus oli fri, i tekem olgeta oli gobak long kantri blong olgeta. Bambae profet tok ya i kamtru bakegen long wan fasin we i bigwan moa long taem blong yumi. Jeova God i no gat fasin blong talem “tumas promes,” we i no mekem ol promes ya oli kamtru, nogat. From we hem i Hae Olgeta mo i Wokem Olgeta man, hem i nafgud blong finisim ol “faet.” Aninit long Kingdom blong God, bambae i gat pis long evri ples. !Ol faet bambae i finis blong olwe!—Daniel 2:44.