Wan Lesen We i Kamaot Long Man Blong Solwota
MAN we i stap ron hem wan long wan bot long solwota, hem i save kam taed. Sloslou taed i save mekem se man ya i no moa tingbaot se hem i stap long denja. Nao bambae i isi blong hem i mekem ol mastik mo ol rong disisen long taem ya. From samting ya, hem i glad sipos i gat angka long bot ya. Angka i givhan long wan sela we i taed blong hem i save spel mo kasembak paoa. Mo long rod ya i no gat denja blong hem i drif sloslou. Long sem taem, angka i mekem se fored blong bot i poen i go long rod we win i stap blu i kam long hem, mo i mekem se bot i no save muf nating.
Long sem fasin we ol sela oli fesem ol denja long solwota, oltaem ol Kristin oli fesem ol hadtaem long wol ya mo oli nidim blong spel. I tru, wan taem Jisas i talem long ol disaepol blong hem se: “Yufala i kam. Yumi go long wan ples we i no gat man, we yufala i save spel smol.” (Mak 6:31) Tede, maet sam oli tekem sam wik blong mekem wan trep, no oli go spenem wan wiken wetem famle blong olgeta blong spel. Fasin ya i save givimbak glad mo paoa long yumi. ?Be yumi save sua olsem wanem long taem ya, se yumi stap sef long saed blong spirit? ?Wanem nao i olsem angka blong yumi long saed blong spirit, we bambae i halpem yumi blong no drif sloslou, mekem se yumi save stap strong we yumi no muf nating?
Jeova i kaen from we hem i givim wan samting i kam long yumi. Hemia nao Baebol, we i no gat wan narafala samting i nambawan olsem hem. Taem yumi ridim hem evri dei, bambae yumi save stap klosap long Jeova mo neva drif i gowe long hem. Ol advaes blong hem i save mekem yumi strong we yumi no muf nating. Mo hem i save mekem se yumi stanap strong agensem ol traem blong Setan mo blong wol blong hem. Yumi mas folem wan program blong ridim Baebol oltaem, nating se maet samtaem yumi mestem. Nao angka ya long saed blong spirit bambae i holemtaet yumi.—Josua 1:7, 8; Kolosi 2:7.
Man blong raetem Ol Sam i tokbaot ol man we “oli save harem gud. Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet.” (Ol Sam 1:1, 2) Sipos yumi ridim tok blong God evri dei, frut we i kamaot se yumi save “haremgud,” from we samting ya i givimbak glad mo paoa long yumi, nao yumi save folem ol Kristin rod.