“Wan Eksampol Blong Fasin Joengud”

HEMIA stamba tok blong wan stori long wan niuspepa long Indaiatuba, São Paulo, Brasil. ?Hu olgeta we oli soem gudfala eksampol ya? Man we i raetem stori ya i talem se: “Ol Witnes blong Jeova, oli plan blong bildim wan niufala ‘Haos Kingdom,’ hemia nem blong ol tempel no haos wosip blong olgeta. Gudfala eksampol blong olgeta, i olsem strongfala pruf blong fasin blong wokgud tugeta.“

Long ol taem olsem, i klia nomo se ol Witnes blong Jeova oli joengud tugeta. Taswe, stori ya i poenemaot se: “I pulum filing blong yumi taem yumi luk ol man, woman, mo yangfala we oli glad blong wok tugeta blong bildim wan ples we oli save joen tugeta blong wosip long God.”

Ol Witnes blong Jeova oli soem gudfala eksampol long ol narafala rod tu. Man blong niuspepa i gohed i talem se: “Antap long fasin blong stadi mo prea, oli givhan long ol man we oli dipen long alkol mo drag blong jenisim laef blong olgeta. Oli tijim ol man olsem wanem blong joengud tugeta mo lavem ol narafala.” ?Olsem wanem oli mekem samting ya? Ol Witnes oli save se taem wan man i stadi long Baebol mo i mekem advaes blong Baebol i wok long laef blong hem, samting ya i save halpem hem blong lego ol nogud fasin. Taswe, wanem samting we olgeta oli lanem long Baebol, oli traehad blong tijim long ol narafala. Stori long niuspepa ya i finis olsem: “Yumi sua se hemia wan eksampol we i impoten tumas blong ol man oli folem.”

Eni man i save kam joen long ol miting blong ol Witnes blong Jeova, i no gat kleksin. Mifala i glad blong singaot yu blong kam long wan Haos Kingdom long eria blong yu.