?Ol Skul Bambae Oli Joengud i No Longtaem?

Christian Krause we i presiden blong Lutheran World Federation i talem se: “Yumi stap klosap long wan impoten dei long histri blong ol jos blong yumi.” Long sem fasin, Pop John Paul II i tokbaot “wan impoten taem long strongfala rod ya blong bildimap bakegen fulwan fasin joengud long medel blong ol Kristin.”

Ol tok ya we oli talem wetem strong filing i kamaot taem oli saenem pepa ya Official Common Statement long Oktoba 31, 1999, long Augsburg, Jemani. Long rod ya, oli mekem se Doctrine of Justification insaed long pepa ya Joint Declaration, we bifo finis oli bin kam tugeta blong saenem, i kam moa strong. Oli jusum gud taem mo ples blong saenem pepa ya Official Common Statement. Sam man oli talem se long Oktoba 31, 1517, Martin Luther i nilim wan pepa long doa blong bigfala jos haos blong Wittenberg. I gat 95 poen long pepa ya we oli kamaot long tingting blong hem wan, mo long rod ya, hem i statem Refomesena blong Protestan. Be Augsburg i ples ya we long 1530, ol Lutheran oli soemaot ol stamba bilif blong olgeta long evriwan. Oli kolem taem ya se Augsburg Confession. Jos blong Katolik i agensem samting ya bigwan mekem se ol bilif blong Protestan mo Katolik i seraot, we oli no moa save joengud bakegen.

?Pepa ya we oli saenem, hem i save mekem se oli winim fasin seraot blong jos, olsem we oli bin talem? Olgeta we oli saenem pepa ya, i no evriwan we oli agri. Moa long 250 Protestan we oli gat bigfala save long bilif blong jos oli agensem samting ya, mo oli givim woning se Katolik Jos bambae i save bos antap long olgeta. Ol Protestan oli kros tu, taem Katolik Jos i talemaot se yia 2000 bambae i wan spesel taemblong karemaot sin we man i save pas from long pegatri. Hemia nao wan long olgeta bilif we i statem fasin seraot bitwin tufala jos ya 500 yia bifo. I no sua se fasin joengud i save kamaot from we Augsburg Confession mo ol niufala bilif blong Katolik we Kaonsel blong Trent i letem i stap, oli gat paoa yet.

Fasin seraot mo fasin agens insaed long Krisendom i bigwan tumas. Eni pepa we oli joen blong saenem i no save stretem problem ya. Antap moa, fasin joengud long bilif i fas strong wetem ol tijing we oli stanap long Tok blong God, Baebol. (Efesas 4:​3-6) Fasin joengud i no save kamaot sipos man i wantem lego sam rul blong Baebol. Defren olgeta, trufala fasin joengud i kamaot nomo taem man i lanem mo i mekem wanem we God i askem long hem. Profet Maeka we i gat strongfala bilif i talemaot se: “Nating we olgeta man long wol ya oli stap mekem wosip long ol god blong olgeta, mo oli stap obei long olgeta, be yumi ya, Hae God i God blong yumi, mo bambae yumi stap mekem wosip long hem, mo yumi stap obei long hem oltaem nomo, gogo i no save finis.”​—Maeka 4:5.

[Futnot]

[Foto Credit Line blong pija long pej 32]

© Ralph Orlowski/REUTERS/Archive Photos