‘Mekem Nambuton Blong Yumi i Kamgud Bakegen’
OL MAN oli bilif se plante long ol sik we man i stap kasem tede oli kamaot from ol filing olsem fraet, soasore, jalus, kros, no laekem narafala, mo we man i harem se hem i gat fol. !From samting ya, yumi harem gud from we tok blong Baebol i talem se ‘fraet long Jeova’ i ‘mekem nambuton blong yumi i kamgud bakegen, mo bambae i mekem ol bun blong yumi oli haremgud’!—Ol Proveb 3:7, 8, NW.
Ol bun oli holemtaet bodi. Taswe Baebol i yusum tok ya “ol bun” olsem wan pija tok, blong soemaot se ol dip filing oli gat paoa long man. ?Be olsem wanem fasin blong fraetgud long Jeova i “mekem nambuton blong yu i kamgud bakegen”?
Ol man we oli stadi long Baebol oli gat ol defren tingting long tok ya “nambuton” we i stap long vas ya. Wan man i eksplenem se, from we “nambuton” i stap “long medel blong bodi,” hem i save minim ol impoten haf blong bodi. Wan narafala man blong hae save i talem se maet tok ya “nambuton” i minim rop blong nambuton, olsem we Esikel 16:4 i tokbaot. Sipos samting ya i tru, maet Ol Proveb 3:8 i makemgud se yumi dipen fulwan long God, olsem wan bebi long bel blong mama blong hem, i dipen long mama blong kasem kakae. Nating se i olsem wan narafala tingting hemia se maet “nambuton” long ples ya i minim ol masel mo string blong bodi. Maet vas ya i soemaot se ol haf ya blong bodi oli defren long “ol bun” hemia ol haf blong bodi we oli moa strong.
Nating se stret mining blong hem i olsem wanem, i gat wan samting we yumi sua long hem se: Fasin we i waes hemia blong ona mo fraetgud long Jeova. Taem yumi folem gud ol loa blong God, samting ya i save halpem yumi naoia long saed blong bodi. Mo antap long samting ya, fasin ya i save mekem we Jeova i glad long yumi, mo lidim yumi go kasem laef we i no save finis we helt mo filing i kam gud fulwan long niufala wol we i stap kam.—Aesea 33:24; Revelesen 21:4; 22:2.
[Foto Credit Line blong pija long pej 32]
Dr. G. Moscoso/SPL/Photo Researchers