“?I Tru Se God i Stap Bonem Ol Man Long Helfaea?”
“?Yutufala i man blong stadi long bilif blong ol jos?”
Joel mo Carl i sapraes long kwestin ya. Tufala yangfala ya i wok long hedkwota blong ol Witnes blong Jeova long Brooklyn, New York. Wan dei, tufala i stap lukluk ol buk long wan buksap klosap. Ale, taem Joel i stap lukluk sam indeks blong ol tok blong Baebol, Carl i stap tokbaot storian we hem i bin gat wetem wan man long wok blong prij. Nao, wan man we i stap stanap klosap long tufala i harem wanem we tufala i stap tokbaot, ale hem i kam toktok long tufala.
Man ya i no askem kwestin ya blong save nomo sipos tufala i stap stadi long saed blong bilif blong ol jos. Hem i gohed i se: “Mi mi joen long skul blong ol man Jiu, mo sam fren blong mi we oli Kristin oli talem long mi se bambae God i bonem mi long helfaea from we ol man Jiu nao oli bin sakemaot Jisas. Samting ya i mekem tingting blong mi i trabol tumas. Sipos God i gat lav, i no stret blong hem i givim panis olsem. ?I tru se God i stap bonem ol man long helfaea?”
Joel mo Carl, tufala i talem long man ya se tufala i stap mekem ol dip stadi long Baebol. Tufala i yusum Baebol blong soem long hem se ol dedman oli no save wan samting nating, mo i olsem we oli stap slip nomo, oli wet blong laef bakegen long fiuja. Taswe, ol dedman oli no save harem nogud, mo oli no stap safa long helfaea. (Ol Sam 146:3, 4; Prija 9:5, 10; Daniel 12:13; Jon 11:11-14, 23-26) Joel mo Carl, tufala i spenem klosap wan aoa wetem man ya. Nao biaen, hem i givim adres blong hem long Joel mo Carl, mo i askem tufala blong kam luk hem long haos blong hem blong stori moa long saed ya.
Traem tingbaot: ?Sipos hel i wan ples blong safa long faea, bambae man i wantem go long ples ya? No gat. Be taem Job i stap harem nogud, hem i askem se: “Plis yu haedem mi long hel, plis yu livim mi mi stap haed gogo kasem taem we bambae kros blong yu i finis, plis yu makem dei we bambae yu yu save tingbaot mi bakegen.” (Job 14:13, Douay Version) I klia nomo we Job i no bilif se hel i wan ples blong safa, from we hem i wantem go long hel blong i no moa harem nogud. Taem man i ded, hemia i min se hem i no moa laef i stap, mo hel we Baebol i tokbaot, hem i minim beregraon blong ol man.
Sipos yu wantem save moa long saed blong wanem we i hapen long yumi taem yumi ded, mo wanem hop blong man we i ded, mifala i askem yu blong raet long mifala long adres we i stap daon.