Hem i No Olfala Tumas Blong Lanem Samting
KSENIYA i bon long 1897. Hem i gat 3 gel, wan boe, 15 smol bubu, mo 25 pikinini blong smol bubu blong hem tu. Long ful laef blong hem, hem i bin mekem wanem we papa mama blong hem tufala i tijim hem blong mekem. Hem i kam long Moscow olsem wan refuji, from we i gat faet long Ripablik blong Abkhaz, bitwin Blak Si mo Bigfala Hil ya Caucasus. Nating se i olsem, hem i glad long laef blong hem, antap moa long bilif we hem i kasem from ol bubu blong hem.
Long 1993, gel blong Kseniya, Meri, i kam wan Witnes blong Jeova. Meri i stat storian wetem Kseniya long saed blong Jeova God mo long saed blong Baebol, be hem i no wantem lesin long Meri. Oltaem Kseniya i stap talem long gel blong hem se: “Mi olfala tumas naoia blong lanem wan niufala samting.”
Nating se Kseniya i talem samting ya, gel blong hem Meri, wetem Londa we hem i waef blong smol bubu blong hem, mo tufala pikinini blong smol bubu blong hem, hemia Nana mo Zaza, olgeta evriwan oli Witnes blong Jeova mo oli gohed blong storian wetem Kseniya long saed blong Baebol. Wan naet long 1999, oli ridim wan vas long Kseniya we i tajem hat blong hem. Long vas ya, i gat gudfala tok we Jisas i givim long ol aposol blong hem long taem we hem i stanemap Lodsapa. (Luk 22:19, 20) Long naet ya, taem Kseniya i gat 102 yia, hem i tekem disisen blong stat blong stadi Baebol.
Kseniya i talem se: “Mi bin laef 102 yia finis, be naoia laef blong mi i gat mining. Naoia mi luksave we i no gat wan samting i moa gud i bitim fasin ya blong mekem wok blong Jeova, nambawan God blong yumi we i gat lav. Bodi blong mi i strong yet, mo helt blong mi i oraet. Mi no nidim ol glas blong rid mo mi stap joengud wetem famle blong mi yet.”
Long Novemba 5, 2000, Kseniya i bin tekem baptaes. Hem i talem se: “Naoia mi givim laef blong mi i go long Jeova blong mekem wok blong hem wetem lav. Mi seremaot ol magasin mo ol traket, taem mi stap sidaon long bas stop, klosap long haos blong mi. Plante taem, famle blong mi i kam visitim mi, mo mi glad blong serem trutok long saed blong Jeova wetem olgeta.”
Kseniya i stap wet long taem ya we bambae ‘bodi blong hem i kam yangfala olsem long yang taem blong hem, mo bambae hem i kasem paoa bakegen olsem long ol dei blong yangfala taem blong hem.’ (Job 33:25, NW) ?Sipos wan woman we i gat bitim 100 yia i naf blong lanem tijing blong Baebol long saed blong mining blong laef, olsem wanem long yu?