“?Yufala i Save From Wanem Mi Karem Mane Blong Yufala i Kambak?”
‘!MI RILI nidim mane!’ Hemia tok blong Nana, wan mama we i stap lukaot hem wan long ol trifala boe blong hem. Nana i laef long distrik blong Kaspi long Ripablik blong Jojia. Wan moning, hop blong hem blong faenem mane i kamtru. Hem i faenem 300 lari [22,000 vatu] klosap long polis stesen. I no gat man i stap raonabaot. Mo hemia i bigfala mane ya. Nana i neva luk wan pepa mane blong 100 lari [7,300 vatu] long ol faef yia we oli pas, stat long taem we lari i kam mane we oli stap yusum long Jojia. Ol bisnesman blong ples ya oli no save kasem pei olsemia, nating se oli wok blong plante yia.
Nana i ting se: ‘?Mi nidim mane ya blong mekem wanem? Sipos mi kipim mane ya, bambae mi lusum bilif blong mi, mi no moa fraet blong mekem samting we God i no laekem, mo mi no moa stanap strong long saed blong spirit. Hemia i nogud tumas.’ Nana i bin wokem ol Kristin fasin ya taem hem i mas fesem ol bigfala traem mo sam man oli kilim nogud hem, from bilif blong hem.
Taem Nana i go long polis stesen, hem i luk faef polisman we oli wari tumas oli stap lukaot wan samting. Nana i kasem se oli stap lukaot mane ya, taswe hem i kam klosap long olgeta mo i talem se: “?Yufala i lusum wan samting?”
Oli ansa se: “Mane.”
“?Hamas mane?”
“!Tri handred lari!”
Nana i talem se: “Mi faenem mane blong yufala.” Biaen hem i askem se: “?Yufala i save from wanem mi karem mane blong yufala i kambak?” Olgeta oli no save.
Ale, Nana i ansa se: “From we mi mi wan Witnes blong Jeova. Sipos mi no wan Witnes, bambae mi no karem mane blong yufala i kambak.”
Jif blong ol polis, we i bin lusum mane ya, i givim 20 lari [1,500 vatu] long Nana blong talem tangkiu long hem from we hem i gat stret fasin.
Stori ya i goraon kwiktaem nomo long distrik blong Kaspi. Wan dei biaen, wan haosgel we i wok long polis stesen i talem long Nana se: “Oltaem [Jif ya] i gat ol buk blong yufala i stap long ofis blong hem. Ating naoia bambae hem i laekem moa ol buk blong yufala.” Antap long samting ya wan polis ofisa i talem se: “Sipos evri man oli Witnes blong Jeova, bambae i no gat man blong brekem loa.”