“!Tok Blong Yu i Tru Nomo, Laef i Nambawan!”

?YU WANTEM save trufala mining blong laef? Magdalena i gat 18 yia blong hem, hem i wan Witnes blong Jeova we i laef long Szczecin, Polan, mo hem i bin halpem Katarzyna, wan fren long haeskul blong hem blong hem i kasem save ya. Katarzyna i no bilif long God nating, be taem Magdalena i tokbaot Baebol wetem hem, Katarzyna i rili soem intres.

Nating se Katarzyna i glad blong storian wetem Magdalena long saed blong Baebol, be hem i no save akseptem Baebol fulwan. Wan dei taem Katarzyna i stap tokbaot ol trufala fren wetem Magdalena, hem i bin talem se: “Yufala i gat Baebol; yufala i save wanem rul we i stret blong folem mo weples nao blong faenem ol fren. ?Be olsem wanem long olgeta ya we, kam kasem naoia, oli no save akseptem ol rul ya?”

Wan impoten jenis i kamaot long Katarzyna taem hem i go long London, Inglan. Long ples ya hem i visitim branj ofis blong ol Witnes blong Jeova, mo kaen fasin blong ol Witnes i rili tajem hat blong hem. Ol smosmol samting we oli mekem, olsem fasin blong openem doa long hem, no lesingud long ol samting we hem i talem, ol samting ya oli rili mekem hem i haremgud.

Long Septemba 2001, taem niufala skul yia i stat, Katarzyna i tekem disisen blong stadi long Baebol. Hem i laekem tumas ol rul blong Baebol, mo hem i stat mekem ol rul ya oli wok long laef blong hem. I no longtaem i pas Katarzyna i talem long Magdalena se: “Mi harem olsem se mi statem wan niufala laef.” Mo tu, hem i livim wan smol mesej long mobael fon blong Magdalena i se: “!Tangkiu tumas long stadi we yumitu mekem tede! !Tok blong yu i tru nomo! !Laef i nambawan! I gud tumas blong save Man ya we yumi mas gat tangkiu long hem from.”