Wan Video Kaset We Oli Wokem Blong Pulum Hat Blong Ol Yangfala

VIDEO kaset ya, Young People Ask​—How Can I Make Real Friends?a i pulum plante yangfala blong tingtinggud long wanem fasin we oli stap folem long laef blong olgeta. Long video kaset ya i gat ol gudfala advaes blong Baebol, i gat toktok blong sam yangfala Kristin we oli talem prapa tingting blong olgeta, mo wan nambawan drama we i stanap long stori blong Daena, we i stap long Baebol. (Jenesis, japta 34) Ol komen we oli kam biaen long saed blong video kaset ya, oli kamaot long Meksiko.

Martha i talem se: “Video kaset ya i kasemgud hat blong mi. I luk olsem oli wokem video kaset ya blong mi nomo. Bifo, mi ting se i naf sipos ol tija blong mi wetem olgeta we oli skul wetem mi, oli save we mi mi wan Witnes blong Jeova. Be mi neva pruvum samting ya, from we mi neva prij long olgeta. Mi tangkiu long Jeova from ol gudfala save we hem i stap givim long mifala, speseli taem save ya i tajem dip ol filing blong mifala, olsem video kaset ya i mekem.”

Juan Carlos i talem se: “Video kaset ya i mekem man i tingting. Taem mi yangfala yet, mi mekem sam mastik, mo sam fasin blong mi oli sem mak nomo long ol fasin blong sam yangfala we oli plei long drama ya. Sam yia bifo mi gat wan dabol laef, be mi luksave we wan laef olsem i save karem plante trabol. Naoia we mi bin wajem video ya, mi gat strong tingting blong stap tru long Jeova.”

Sulem i talem se: “Taem mi wajem video kaset ya, mi harem ol filing blong mi oli wok insaed long mi. Smoltaem bifo long hemia, mi bin stopem fasin ya blong ridim Baebol, mo mi no prea plante long Jeova. Taem mi lesin long ol komen blong ol yangfala long video ya, samting ya i pulum mi blong stadi long Baebol bakegen mo prea long Jeova.”

Tede ol yangfala oli stap fesem plante traem, mo ol fren we oli jusum oli save gat bigfala paoa long fasin blong laef blong olgeta. (Ol Sam 26:4; Ol Proveb 13:20) Video kaset ya Young People Ask​—How Can I Make Real Friends? i halpem plante yangfala blong tekem ol gudfala disisen long saed ya.

[Futnot]