?Mekem Gudfala Fasin No Stap Longwe Nomo Long Rabis Fasin?

“WANEM we yu no wantem se narafala i mekem long yu, yu no mas mekem long hem tu.” Hemia tijing blong wan Jaenis tija blong hae save, nem blong hem Confucius. Tede, 2,500 yia i pas nao, we plante man oli holem tingting ya se wan man hem i stret man sipos hem i no mekem samting we i nogud long narafala.

Blong talem stret, tijing ya blong Confucius hem i gud. Be, Baebol i tokbaot wan narafala tingting tu long saed blong fasin blong ol man mo aksin we oli mekem bitwin long olgeta. Fasin ya we man i mekem nogud agensem narafala man, hem i wan sin. Be Baebol i talem se fasin ya we man i save wanem we i gud blong mekem be i no mekem, hemia tu i wan sin. Kristin disaepol Jemes i raetem se: “Man we i save wanem fasin i stret blong mekem, be hem i no mekem, hem i mekem sin ya.” (Jemes 4:17) Ol Kristin oli kasem tijing ya se oli no mas mekem i nogud long narafala, be i no hemia nomo. Antap long hemia, Jisas i givim oda ya se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.”​—Matiu 7:12.

Fastaem olgeta, God i wantem we olgeta man oli mekem samting long narafala olsem we oli wantem we narafala i mekem long olgeta. Hem i soemaot beswan eksampol blong fasin ya blong kea long narafala, taem hem i mekem man: “God i stat wokem man, i olsem pija blong hem. Hem i wokem hem i olsem pija blong God. Hem i wokem tufala, man mo woman.” (Jenesis 1:​27, NW) Hemia i minim se taem God, we i gat lav, i mekem man, hem i putum wan tingting long man we i save givhan long hem blong luksave samting we i gud long samting we i nogud. Sipos man i trenemgud tingting ya, tingting ya bambae i lidim hem blong mekem samting long narafala olsem we hem i wantem se narafala i mekem long hem.

Plante man tede oli safa from we oli no moa gat hop mo oli no save ronwe long ol narafala man we oli no kea mo we oli tingbaot olgeta nomo. Taswe, i klia se fasin blong no spolem narafala mo no givim kil long narafala, hemia i gud be i no naf. Antap long hemia, man i mas mekem samting we i gud mo we i givhan long narafala. From samting ya, ol Witnes blong Jeova oli mekem wan wok we i fri nomo blong halpem ol narafala blong save long nambawan hop ya we i stap long Tok blong God, Baebol. Taem oli talemaot gud nius blong Baebol long ol narafala, oli mekem wetem fasin lav. Oli mekem samting long narafala olsem we oli wantem se narafala i mekem long olgeta.