Taem Blong Kakae—!Hem i No Jes Wan Taem Blong Fulumap Bel Nomo!

YUMI evriwan i glad tumas blong kakae wan gudfala kakae. Nao sipos long semtaem ya we yumi stap kakae yumi joen mo storian gud wetem olgeta we yumi laekem olgeta, ale taem blong kakae i kam wan samting we i mekem yumi haremgud moa i bitim we yumi fulumap bel nomo. Plante famle oli wokem fasin ya blong joen wanples blong kakae tugeta wan taem long wan dei. Taem blong kakae i givim janis long olgeta insaed long famle blong tokbaot ol samting we oli hapen long dei ya mo ol plan blong olgeta tu. Ol papa mama oli save kasem save long tingting mo filing blong ol pikinini blong olgeta sipos oli lesin taem ol pikinini blong olgeta oli toktok mo taem oli talemaot ol tingting blong olgeta. Sipos oli stap mekem samting ya oltaem, glad taem ya we oli gat taem oli joen tugeta blong kakae i mekem famle i harem sef, i gat fasin tras mo i gat lav tu we i mekem famle laef i stap strong.

Tede, plante memba blong famle oli bisi mo oltaem oli gat ol samting blong mekem taswe oli faenem se i had blong joen tugeta blong kakae. Long sam ples long wol, kastom blong olgeta i no agri long fasin ya we wan famle i kakae tugeta no i toktok long taem blong kakae tu. Sam nara famle oli gat fasin ya blong putum TV long taem blong kakae, ale oli no gat janis blong storian long ol samting we i save givhan long olgeta.

Be oltaem ol Kristin papa mama oli faenem taem blong bildimap famle blong olgeta. (Ol Proveb 24:27) Longtaem finis, ol papa mama oli kasem advaes ya se wan long ol beswan rod blong tokbaot tok blong God long ol pikinini blong olgeta hemia ‘taem oli stap sidaon long haos.’ (Dutronome 6:7, NW ) Sipos oltaem oli stap sidaon tugeta blong kakae, hemia wan janis blong ol papa mama blong pulum ol pikinini blong olgeta blong lavem Jeova mo ol stretfala rul blong hem wetem fulhat blong olgeta. Taem yu stap traehad blong mekem se laef blong famle i hapi mo tingting blong evriwan i stap kwaet, yu save mekem se taem blong kakae i kam wan hapi taem, mo wan taem blong bildimap famle blong yu tu. !Yes, mekem se taem blong kakae i no jes wan taem blong fulumap bel nomo!