Wan Taem Blong Tingbaot

WAN taem blong tingbaot wanem? Hemia blong tingbaot wan man we i ded klosap 2000 yia bifo finis. Man ya i bin talem se: “Mi mi glad blong mi ded blong sevem olgeta, blong biaen, bambae mi save tekem laef blong mi bakegen. I no gat man i save tekemaot laef blong mi. Mi mi save letem laef blong mi, olsem we mi nomo mi wantem.” (Jon 10:​17, 18) Man ya hemia Jisas Kraes.

Jisas i givim oda long ol man blong hem blong oli mekem Memoriol blong tingbaot ded blong hem we i olsem wan sakrefaes. Narafala nem blong Memoriol ya hemia “Kakae blong Masta,” no “Lodsapa.” (1 Korin 11:​20, King James Version) Long Tasde, Maj 24, 2005, afta we san i godaon, ol Witnes blong Jeova mo ol fren blong olgeta bambae oli mekem Memoriol ya we Jisas i stanemap blong tingbaot ded blong hem.

Bambae i gat wan tok we i kamaot long Baebol we i eksplenem mining blong bred we i no gat is long hem mo red waen we oli yusum long lafet ya. (Matiu 26:​26-​28) Tok ya bambae i ansarem sam kwestin olsem: ?Ol Kristin oli mas mekem lafet ya hamas taem long wan yia? ?Hu nomo i gat raet blong kakae bred mo dring waen? ?Hu i kasem blesing from sakrefaes blong Jisas? Impoten taem ya bambae i halpem yumi evriwan blong kasem save mining blong laef mo ded blong Jisas.

Mifala i glad blong welkamem yu long Memoriol ya blong ded blong Jisas. Plis askem ol Witnes blong Jeova long eria blong yu blong save wanem taem mo ples blong Memoriol ya.