Faswan Baebol Long Lanwis Jemani We i Yusum Nem Blong God
PRAPA nem blong God, Jeova, i stap bitim 7,000 taem insaed long Baebol ya New World Translation of the Holy Scriptures we i kamaot long lanwis Jemani long 1971.a Be hemia i no faswan Baebol long lanwis Jemani we i yusum nem blong God. I luk olsem se klosap 500 yia i pas finis, Johann Eck, wan haeman blong Roman Katolik Jos we i stadi long bilif blong jos, i bin prentem faswan Baebol long lanwis Jemani we i gat nem blong Jeova i stap insaed long hem.
Johann Eck i bon long 1486 long saot blong Jemani. Taem hem i gat 24 yia, hem i wan tija we i tijim histri blong ol jos long yunivesiti blong Ingolstadt. Hem i holem wok ya kasem we hem i ded long 1543. Eck i laef long taem blong Martin Luther mo tufala ya i fren blong smoltaem. Be biaen Luther i sapotem Refomesenb mo Eck i stanap long saed blong Katolik Jos.
Wan haeman blong Bavaria i givim oda long Eck blong hem i transletem Baebol i go long lanwis Jemani mo oli prentem Baebol ya we Eck i tanem long yia 1537. Wan buk (Kirchliches Handlexikon) i talem se Baebol ya we Eck i transletem i folem gud mining blong ol tok long ol olfala hanraet mo “i gud sipos i gat moa man we oli tinghae long Baebol ya.” Eck i transletem vas blong Eksodas 6:3 se: “Mi mi Hae God, mi mi kamtru long Ebraham, Aesak mo Jekob, mo mi soemaot long trifala ya we mi mi gat Olgeta Paoa. Mo nem blong mi Adonai, mi mi no soemaot long trifala.” Eck i raetem wan smol tok bakegen klosap long vas ya i se: “Nem ya Adonai Jehoua.” Plante man we oli stadi long Baebol oli ting se hemia faswan taem we wan Baebol long lanwis Jemani i yusum prapa nem blong God.
Be blong plante taosen yia finis, ol man oli bin save mo yusum prapa nem blong God. Faswan Baebol long lanwis blong Jemani i yusum nem ya “Jeova” olsem we Baebol long lanwis Hibru i bin raetem finis, blong tokbaot trufala God. (Dutronome 6:4) Klosap 2,000 yia finis, Baebol ya long lanwis Grik i talem tok ya blong Jisas se hem i mekem ol man oli save nem blong God. (Jon 17:6) Tede, ol man oli save ridim nem ya long plante defren lanwis mo i no longtaem bambae tok blong Ol Sam 83:18 i kamtru fulwan se, olgeta man bambae oli save se God ya we nem blong hem Jeova, hem i Hae God long olgeta ples long wol.
[Ol Futnot]
a Ol Witnes blong Jeova oli wokem Baebol ya long 1961, mo hem i kamaot fastaem long Inglis lanwis nomo. Naoia fulwan Baebol ya no haf blong hem i stap long bitim 50 lanwis.
b Wan grup afta 1500 we i agensem plante tijing blong Katolik Jos mo i statem Protestan Skul.
[Tok blong pija long pej 32]
Baebol we Johann Eck i transletem long 1558 we i gat ol smol tok blong talem nem blong Jeova long Eksodas 6:3