?Jisas i Tijim Wanem Long Saed Blong Hem Wan?

“Jisas i no gat tingting we i hafhaf se hem i hu, hem i kamaot long weples, from wanem hem i kam long wol, mo wanem fiuja blong hem.”​—HERBERT LOCKYER, WAN MAN BLONG RAETEM OL BUK.

BIFO we yumi lesin mo bilif long ol tijing blong Jisas, yumi mas save sam samting long saed blong hem. ?Hu ya Jisas? ?Hem i kam wea? ?Hem i kam long wol ya blong mekem wanem? Yumi save faenem ansa blong ol kwestin ya long Gospel blong Matiu, Mak, Luk mo Jon. Long ples ya, Jisas hem wan i givim ansa blong ol kwestin ya.

Hem i laef bifo we i kam long wol Wan taem, Jisas i talem se: “Taem we Ebraham i no bon yet, be mi mi stap finis.” (Jon 8:58) Samwe long 2,000 yia bifo we Jisas i bon, Ebraham i laef. Be Jisas i laef longtaem bifo long taem blong Ebraham. ?Jisas i laef weples? Hem i eksplenem se: “Mi mi . . . kamaot long heven.”—Jon 6:38.

Pikinini blong God Jeova i gat plante pikinini blong hem long heven, hemia ol enjel. Be Jisas i defren long olgeta. Jisas i tokbaot hem wan se i “stret Pikinini blong God.” (Jon 3:18) Tok ya i min se Jisas nomo we God i wokem hem stret. I no gat wan narafala man we i givhan long Hem blong wokem Jisas. Biaen, stret Pikinini ya blong God i givhan long God blong wokem ol narafala samting.—Kolosi 1:16.

“Pikinini blong Man” Jisas i yusum tok ya moa i bitim ol narafala tok, blong tokbaot hem wan. (Matiu 8:20) Samting ya i soemaot we Jisas i no wan enjel we i tekem bodi blong man, no we i jenisim bodi blong hem blong ol man oli save luk hem. Nogat. Hem i wan trufala man we i gat mit mo blad. God i yusum tabu spirit blong jenisim laef blong Pikinini blong hem long heven i kam olsem laef blong ol man long wol. Hem i putum laef ya i go long bel blong wan yang gel we nem blong hem Meri. Long rod ya nao, Meri i bonem wan bebi we i no gat sin.—Matiu 1:18; Luk 1:35; Jon 8:46.

Mesaea ya we God i promes blong sanem Wan woman Sameria i talem long Jisas se: “Mi mi save we Mesaea ya hem i mas kam.” Jisas i ansa se: “Mi ya nao, mi stap toktok wetem yu.” (Jon 4:25, 26) Tok ya “Mesaea,” i sem mak long tok ya “Kraes.” Tufala tok ya i minim, “Man we God i Jusumaot.” God i jusumaot Jisas mo i putumap hem long wan spesel wok we i mekem ol promes blong God oli kamtru.

?Wanem faswan bigfala wok we hem i kam blong mekem? Wan taem, Jisas i talem se: “Mi mas talemaot gud nius ya [“blong kingdom blong God,” NW] long olgeta, . . . from we God i sanem mi blong mi mekem olsem.” (Luk 4:43) Nating se hem i mekem plante gudfala wok blong givhan long ol man, be faswan samting long laef blong hem hemia blong talemaot Kingdom blong God. Biaen, bambae yumi tokbaot samting we hem i tijim long saed blong Kingdom ya.

I klia se, Jisas i no wan man olbaot nomo.a Bambae yumi luk long ol narafala haf se, laef we hem i gat long heven bifo we hem i kam long wol, i gat bigfala paoa long ol tok we hem i talemaot taem hem i stap long wol. Yumi no sapraes we tijing blong hem i jenisim laef blong plante milian man long wol.

[Futnot]