Samting We i Hapen Long Iden—?From Wanem Yu Mas Tingting Gud Long Hem?

SAM man we oli skul gud oli tok agensem stori blong gudfala ples ya long Iden. Oli talem se i no gat wan narafala ples long Baebol we i tokbaot gudfala ples ya Iden. Paul Morris i wan tija long yunivesiti we hem i tijim ol save long saed blong ol skul, mo hem i raetem toktok ya se: “I no gat wan narafala ples long Baebol we i tokbaot stori ya blong Iden.” Ating plante man blong “hae save” bambae oli agri long tok blong man ya. Be i gat pruf i stap se tok blong man ya i no tru.

I gat sam narafala vas blong Baebol we oli tokbaot gudfala ples ya Iden, oli tokbaot Adam mo Iv, mo oli tokbaot snek tu.a Taswe tok blong ol man ya we oli skul gud i no tru nating. Be rong blong ol man ya i smol nomo taem yumi tingbaot rong blong ol lida blong skul mo ol man we oli traem pruvum se Baebol i no kamaot long God. Toktok blong olgeta ya i gat bigfala paoa long tingting blong plante man. Taem oli tok agensem stori blong Jenesis long saed blong gudfala ples ya long Iden, oli stap agensem ful Baebol wantaem. ?From wanem yumi talem olsem?

Yumi mas save gud mo yumi mas bilif long ol samting we oli hapen long gudfala ples ya Iden. Long rod ya nao, bambae yumi kasem save mining blong ol narafala tok blong Baebol. Tok blong God i save halpem yumi blong faenem ansa long sam impoten kwestin we plante man oli wantem tumas blong save. Ansa blong plante long ol kwestin ya i laenap wetem ol samting we oli hapen long gudfala ples ya long Iden. Tingbaot sam long ol kwestin ya.

● ?From wanem yumi stap kam olfala mo yumi ded? Sipos Adam mo Iv, tufala i obei long Jehova, tufala i save laef gogo i no save finis. Be sipos tufala i agensem Jehova, tufala i no moa obei long hem, bambae tufala i ded. Taswe long dei we tufala ya i agensem God, bodi blong tufala i no moa strong blong laef longtaem. Tufala i stat blong kam olfala mo biaen, tufala i ded. (Jenesis 2:16, 17; 3:19) Bodi blong tufala i no moa stret gud olgeta. Ale taem tufala i gat pikinini, ol pikinini blong tufala oli gat sin mo bodi blong olgeta i no strong blong laef longtaem. Taswe Baebol i talem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.”—Rom 5:12.

● ?From wanem God i letem rabis fasin i stap? Long gudfala ples ya long Iden, Setan i tok nogud long saed blong God. Hem i talem se God i stap giaman mo i stap blokem ol man blong oli no kasem ol gudgudfala samting. (Jenesis 3:3-5) Taem Setan i tok nogud long God olsem, hem i agensem fasin blong Jehova blong rulum man. Adam mo Iv, tufala i jusum blong folem Setan. Hemia i soemaot we tufala tu i no wantem we Jehova i rulum tufala. Mo fasin blong tufala i soemaot se tufala i ting se man hem wan nomo i naf blong luksave wanem samting we i gud mo wanem samting we i nogud. Jehova i wan God we olgeta fasin blong hem oli stret mo hem i waes olgeta. Taswe taem olgeta ya oli agensem rul blong hem, hem i luksave se i gat wan rod nomo blong soemaot we tingting blong olgeta ya i rong. Rod ya se, hem i mas letem taem i pas blong man i rulum man bakegen. Olsem nao, bambae man i soemaot se i tru we hem i naf blong jusum rod blong hem wan no nogat. Ol rabis fasin we oli stap long wol tede, oli kamaot from we ol man oli stap folem tingting blong Setan, mo samting ya i soemaot trutok ya se: Man i no naf blong rulum man, hem i nidim God.—Jeremaea 10:23.

● ?Wanem stamba tingting blong God long saed blong wol ya? Long gudfala ples ya long Iden, Jehova i talemaot olsem wanem wol bambae i kam wan naesfala ples. Hem i talem long Adam mo Iv se bambae tufala i mas gat plante pikinini mo tufala i mas “mekem evri samting long wol ya oli stap aninit long han” blong tufala. Hemia i min se bambae tufala i mekem ful wol ya i kam olsem naesfala ples ya long Iden. Mo olgeta man long wol bambae oli wan famle we i joen gud. (Jenesis 1:28) Taswe stamba tingting blong God long saed blong wol ya, hemia se wol ya i kam wan paradaes we i fulap long ol man we oli stret gud olgeta mo we oli joen gud olsem wan famle nomo we oli kamaot long Adam mo Iv. Bighaf blong ol tok we oli stap long Baebol oli tokbaot olsem wanem God bambae i mekem stamba tingting ya blong hem i kamtru.

● ?From wanem Jisas Kraes i kam long wol? Taem Adam mo Iv, tufala i agensem God long gudfala ples ya long Iden, tufala i kasem panis ya blong ded, mo olgeta pikinini blong tufala oli kasem panis ya tu. Be God i gat lav, mo hem i mekem rod blong ol man oli save gat wan gudfala laef bakegen. God i sanem Pikinini blong hem i kam long wol blong givim laef blong hem olsem wan sakrefaes blong pem rod blong ol man oli go fri. (Matiu 20:28) Baebol i talem se Jisas hem i olsem “las Adam.” Hemia i min se Jisas i win long ples we Adam i lus. Jisas i stret gud olgeta mo hem i obei long Jehova oltaem. Nao Jisas i givim laef blong hem long gladhat blong hem nomo, olsem wan sakrefaes we i save pemaot ol man long sin. Long rod ya nao, God i save fogivim sin blong ol man we oli wantem obei long hem mo biaen hem i save givim laef long olgeta, hemia gudfala laef ya we Adam mo Iv i gat bifo we tufala i sin. (1 Korin 15:22, 45; Jon 3:16) Yes, from Jisas nao, stamba tingting blong Jehova i save kamtru. Wol i save kam wan paradaes bakegen, olsem paradaes ya long Iden bifo.b

Stamba tingting blong God i no wan tok haed mo i no wan samting we i had blong man i kasem save long hem. Stamba tingting blong God i wan samting we i tru. Naesfala ples ya long Iden hem i no wan kastom stori. Hem i wan tru ples bifo, we i gat ol anamol mo man i stap long hem. Taswe promes blong God long saed blong paradaes long fiuja, hemia tu i tru mo bambae i kamtru i no longtaem. ?Yu yu wantem stap long gudfala ples ya long fiuja? I stap long yu. God i wantem we plante plante man oli mas kasem nambawan laef ya long fiuja. Nating se wan man i mekem ol fasin we oli nogud, be God i wantem we hem i jenis mo i kasem laef ya.—1 Timoti 2:3, 4.

Bifo we Jisas i ded, hem i toktok long wan man we hem i rabis man. Hem i man blong kilim man i ded. Man ya i save se from ol samting nogud we hem i mekem, i stret we oli kilim hem i ded. Be hem i lukluk i go long Jisas blong Jisas i leftemap tingting blong hem, mo i wantem gat wan gudfala tingting long saed blong fiuja. ?Jisas i talem wanem long hem? Hem i se: “Bambae yu stap wetem mi long Paradaes.” (Luk 23:43) !Yu traem tingbaot samting ya! !Jisas i wantem we man ya i laef bakegen long ded mo i gat janis blong laef olwe long wan paradaes, nating se, bifo, man ya i man blong kilim man i ded! ?Yu no ting se Jisas i wantem we yu tu yu stap long gudfala ples ya? !Yes hem i wantem tumas we yu stap long paradaes! Papa blong hem tu i wantem olsem. Ale sipos yu yu wantem kasem gudfala laef ya long fiuja, yu mas traem bes blong yu blong save gud God ya we hem i mekem gudfala ples ya long Iden bifo.

[Ol futnot]

[Bokis/Tok blong pija long pej 10]

WAN PROFET TOK WE OLGETA TOK BLONG BAEBOL OLI JOEN LONG HEM

“Yu [snek ya] mo woman ya, bambae yutufala i no laeklaekem yutufala, bambae yutufala i stap agens long yutufala. Ol pikinini we bambae oli kamaot biaen long yu, mo ol pikinini we bambae oli kamaot biaen long hem, bambae oli stap badfren long olgeta. Nao wan long ol pikinini ya blong hem bambae i smasem hed blong yu, mo yu bambae yu kakae leg blong hem.”—Jenesis 3:15, futnot.

Long Iden bifo, God i talem profet tok ya we hem i fas profet tok blong Baebol. ?Hu ya woman? ?Hu ya ol pikinini blong woman? ?Hu ya snek? ?Mo hu ya ol pikinini blong snek? ?Bambae oli stap “badfren” olsem wanem?

SNEK

Setan.—Revelesen 12:9.

WOMAN

Ogenaesesen blong Jehova long heven, we i gat ol gudfala enjel long hem. (Galesia 4:26, 27) Aesea i tokbaot “woman” ya se bambae hem i bonem wan pikinini we hemia ol man we God i makemaot olgeta wetem tabu spirit blong hem, nao oli kam neson blong God.—Aesea 54:1; 66:8.

PIKININI BLONG SNEK

Olgeta man we oli jusum blong mekem samting we Setan i wantem.—Jon 8:44.

PIKININI BLONG WOMAN

Faswan hemia Jisas Kraes we hem i kamaot long ogenaesesen blong Jehova long heven. Ol narawan we oli olsem pikinini blong woman ya tu, hemia ol brata blong Kraes we tabu spirit i makemaot olgeta blong oli rul wetem Jisas long heven. Ol Kristin ya we tabu spirit i makemaot olgeta, oli kam olsem “prapa laen blong Isrel.”—Galesia 3:16, 29; 6:16; Jenesis 22:18.

KIL LONG LEG

Hemia i min se wan trabol bambae i kasem Mesaea be trabol ya i olsem kil long leg nomo, from we bambae i no save mekem we Mesaea i lus blong olwe. Setan i mekem rod blong ol man oli kilim Jisas i ded long wol ya. Be biaen, God i mekem Jisas i laef bakegen long ded.

KIL LONG HED

Hemia i min se wan trabol bambae i kasem Setan mo i mekem we Setan i ded. Jisas bambae i mekem we Setan i lus blong olwe. Bifo we Setan i go blong lus olwe, bambae Jisas i karemaot olgeta trabol we Setan i statem long Iden bifo.—1 Jon 3:8; Revelesen 20:10.

Sipos yu wantem ridim wan buk we i givim klia save long ol bigfala tingting we oli stap long Baebol, mo we toktok blong hem i sot nomo blong ridim, yu save ridim smol buk ya long Inglis The Bible—What Is its Message? (long Franis hemia La Bible — Quel est son message ?) Ol Witnes blong Jehova oli wokem buk ya.