Hem i Tok Tru Long Saed Blong Helt
‘Mi mi raetemdaon toti waestok we oli save mekem yu yu gat save, mo oli save givhan long yu. Ol tok ya oli save tijim yu blong yu savegud ol tok we i tru.’—OL PROVEB 22:20, 21.
?BAEBOL I DEFREN OLSEM WANEM? Plante taem ol buk blong bifo oli talem ol samting we i no tru mo i save spolem laef blong man. Ol save we ol saentis oli faenemaot i soemaot se ol tok blong ol buk ya oli no tru. Tede tu ol man blong raetem ol buk oli mas mekem ol niu buk from we ol save long ol buk we oli raetem finis, i no stret. Be Baebol i talem se ol tok blong hem i kamaot long God ya we i mekem olgeta samting, mo ol tok blong hem “bambae i stap oltaem, gogo i no save finis.”—1 Pita 1:25.
YU TRAEM TINGBAOT: Loa we God i givim long Moses i talem se ol man Isrel oli mas gobus “afsaed long ples ya” we oli stap long hem. Mo oli mas digim hol, mo biaen oli mas berem bakegen. (Dutronome 23:12, 13) Sipos oli tajem wan anamol no wan man we i ded, oli mas mekem oli klin bakegen long wota. (Levitikas 11:27, 28; Namba 19:14-16) Man we i kasem sik ya leprosi, i mas stap hem wan go kasem taem we sik blong hem i godaon, blong i no save pasem sik ya long narafala man.—Levitikas 13:1-8.
OL SAVE WE OL MAN OLI FAENEMAOT: Ol klin fasin blong gobus, wasem han, mo blong sikman i stap hem wan, oli givhan blong blokem sik blong i no kasem plante man. Ol man blong Ol Klinik Blong Winim Mo Blokem Ol Sik long Yunaeted Stet, oli talem se sipos i no gat toelet, “yu mas gobus 30 meta longwe long wota, mo biaen yu mas berem sitsit blong yu.” Wol Helt Ogenaesesen i talem se taem ol man we oli stap wanples oli folem ol tok ya, oli mekem se namba blong ol man we oli kasem ol sik olsem sitsit wota, i godaon 36 pesen. Tu handred yia i no pas yet, ol dokta oli faenemaot se oli pasem sik long sikman from we oli no wasem han blong olgeta afta we oli tajem man we i ded. Ol man blong ol klinik ya blong winim mo blokem sik, oli talem se taem man i wasem han blong hem, “hemia i bes samting blong mekem blong no pasem ol sik.” ?Olsem wanem long man we i kasem leprosi no wan narafala rabis sik? ?From wanem hem i mas stap hem wan nomo? I no longtaem wan magasin (Saudi Medical Journal) i talem se: “Taem man i kasem wan rabis sik we i save go long plante man kwiktaem nomo, hem i mas stap hem wan. Hemia nomo rod blong blokem ol rabis sik ya.”
?WANEM TINGTING BLONG YU? ?Yu ting se i gat wan narafala tabu buk we ol tok blong hem i stret long ol save we ol saentis oli faenemaot long saed blong helt? ?No Baebol nomo i olsem?
[Tok blong makem poen long pej 6]
“Olgeta man oli sapraes from ol fasin we ol man long taem blong Moses oli folem, blong oli stap klin.”—MANUAL OF TROPICAL MEDICINE, WE DOKTA ALDO CASTELLANI MO DOKTA ALBERT J. CHALMERS TUFALA I RAETEM