Ol Gudfala Wok Oli Leftemap Nem Blong Jeova
1 !Taem i gat wan bigfala hariken, yu haremgud taem yu faenem wan sefples! Sipos sefples ya i wom mo i sefgud, mo sipos ol man we oli stap long hem oli kaengud long yu, bambae yu glad blong stap long sefples ya. Wok blong talemaot Kingdom i blong pulum ol man oli aot long wol blong Setan, oli kam long wan sefples olsem. ?Ol fasin blong yumi evri dei oli stap pulum ol man oli kam long sefples ya? Jisas i bin talem se bambae ol man oli ‘luk ol gudgudfala wok we yumi stap mekem. Nao, bambae olgeta oli save leftemap nem blong Papa blong yumi, we i stap long heven.’—Mat. 5:16.
2 ?Olsem wanem ol wok blong yumi oli save pulum ol narafala oli kam long Jeova mo ogenaesesen blong hem? Hemia taem yumi folem ol tok blong Jisas long Luk 6:31 mo 10:27 long laef blong yumi. Samting ya bambae i pusum yumi blong kea long ol brata sista blong yumi. Mo tu, fasin ya i mekem se yumi defren long ol man blong wol ya we oli no gat lav mo oli no kea long narafala.
3 Wan dei, taem wan sista i stap long wan bot blong karem ol pasenja, hem i luk wan woman we i sik tumas, i no moa save kea long smol pikinini blong hem. Sista ya i talem long woman ya se bambae hem i lukaot long pikinini blong hem. Taem woman ya i askem olsem wanem hem i save soem tangkiu long sista ya, sista ya i ansa se: ‘Plis, yu lesin long ol Witnes blong Jeova taem oli kam long haos blong yu.’ Woman ya i mekem olsem, mo naoia hem mo hasban blong hem, tufala tugeta i Witnes. Ol gudfala wok oli mekem se tufala i lesin long mesej blong Kingdom.
4 Soem Gudfala Wok Long Fulwan Laef Blong Yumi: Ol fasin we yumi soemaot long ol man klosap long yumi, long ples blong wok, long skul, mo taem yumi stap spel, oli gat paoa long tingting we man i gat long yumi mo skul blong yumi. Taswe, i gud blong askem long yumi wan se: ‘?Ol man oli gat wanem tingting taem oli luk mi mo famle blong mi? ?Ol man we oli stap klosap long mi, oli luk se haos mo yad blong mi i klin? ?Ol fren long ples blong wok mo long skul oli luk se mi stap kam long stret taem mo mi mi wok strong? ?Ol klos mo hea blong mi oli soem se mi mi no bitim mak mo se mi gat respek? Ol nambawan wok blong yumi oli save pulum ol man oli kam long wosip blong Jeova.
5 Pita i givim woning se bambae ol man oli tok nogud long ol Kristin. (1 Pita 4:4) Yumi mas lukaotgud se ol fasin blong yumi oli no pulum man blong daonem nem blong God. (1 Pita 2:12) Sipos ol wok blong yumi evri dei oli leftemap nem blong God we yumi stap wosipim, bambae yumi olsem wan laet we i stap long klia ples, i stap lidim ol man oli kam long sefples we Jeova i givim.—Mat. 5:14-16.