Stadi Long Man We i Hae Moa Long Olgeta Man
1 Long wik we i stat long Ogis 4, bambae yumi stat stadi bakegen long Man We i Hae Moa Long Olgeta Man long Buk Stadi blong yumi. !Bambae yumi glad tumas blong stadi bakegen long laef mo minista wok blong Jisas Kraes! From we buk ya i defren long plante narafala buk we yumi bin stadi long hem, smol advaes ya bambae i givhan long yumi.
2 Buk ya i no gat namba blong ol pej wanwan, taswe program long Kingdom Wok Blong Yumi bambae i talem ol japta we yumi mas stadi long olgeta, maet tri no fo japta evri wik. Japta 35, 111, mo 116 oli longfala bitim ol narafala japta, taswe bambae yumi mekem tu stadi long ol wanwan japta ya. Brata we i lidim stadi bambae i askem wan brata blong ridim ful japta (no wan ful haf blong japta, olsem long japta 35, 111, mo 116). Nao bambae hem i askem ol kwestin long en blong japta we oli stret long haf we brata ya i ridim. I no oltaem we wan ansa i folem narawan long ol japta ya. Ol sot mo klia ansa oli mas stanap long ol save insaed long japta.
3 Afta long samting ya, sipos i gat taem, yumi mas ridim ol vas we oli stap long en blong japta ya. Brata i save seraotem ol longfala haf long ol smol haf, nao plante pablisa oli save rid. Biaen, evriwan oli save talem sam gudfala toktok long haf we wan i bin ridim. Brata we i lidim stadi i save askem ol klia kwestin blong pulum evriwan blong givim ol gudfala ansa mo soem olsem wanem ol vas oli joen wetem stadi. Ol kwestin mo ansa oli mas givhan long olgeta we oli kam long stadi blong tingbaot Jisas Kraes, laef blong hem, mo ol tijing blong hem.
4 Man We i Hae Moa buk i tokbaot ol samting long laef blong Jisas folem stret oda we oli bin hapen long hem. Blong givhan long yumi blong no fogetem ol samting we i bin hapen, yumi save mekem pija long tingting blong yumi mo rimemba weples oli bin hapen. From samting ya, yu mas sua blong tokbaot ol naesfala pija mo lukluk oltaem long map long stat blong buk, afta long fastok.
5 Long faswan wik, bambae yumi stadi long fastok blong buk. Afta we wan brata i ridim wan haf go kasem smol stampa tok, brata we i lidim stadi bambae i askem ol gudfala kwestin we hem i mekemrere finis. Faswan stadi ya bambae i mekem yumi rere long ol stadi long yia we i kam. Blong mekem stadi i rongud, evriwan oli mas reregud. Samting ya i tru moa long brata we i lidim stadi ya. Olsem nao, hem i save givhan long grup blong savegud man we i hae moa long ol narafala man we oli bin laef long wol ya, Masta mo Sevya blong yumi, Jisas Kraes.