Ansa Long Wan Kwestin

◼ ?Olsem wanem wan yangfala pikinini blong wan Kristin papa mama i save joen long wok blong prij bifo oli luksave hem olsem wan pablisa we i no baptaes?

Ol Kristin papa mama oli wantem se ol pikinini blong olgeta oli mas gru blong kam ol bigman long saed blong speret, we oli givim ful laef blong olgeta olsem ol man blong wok blong Jeova. (1 Saml. 2:18, 26; Luk 2:40) Nating se oli yangfala nomo, ol pikinini long ol Kristin famle oli mas rere blong talemaot bilif blong olgeta we i stanap long Baebol. Ol pikinini oli save gru kwiktaem long saed blong speret sipos oli joen oltaem wetem ol papa mama blong olgeta long wok blong prij stat taem oli pikinini yet. Be hem i impoten tumas we hat blong ol yangfala ya i pusum olgeta blong oli save kasem glad long wok blong prij, mo blong oli wantem kam ol pablisa we oli no baptaes, mo gohed blong joen long wok blong talemaot Kingdom. I nidim blong ol papa mama oli trenemgud olgeta. (1 Tim. 4:​6; 2 Tim. 2:15) Ol narafala pablisa we oli gat gudhan oli save halpem olgeta samtaem sipos ol papa mama oli agri long hem.​—Lukluk Our Ministry, pej 99-100 (100-101).

Taem ol pikinini we oli gat gudfala fasin oli go wetem papa mama blong olgeta long wok blong prij, oli stap lanem olsem wanem blong joen long minista wok. Be oli no save kam olsem ol pablisa we oli no baptaes go kasem taem we olgeta nomo oli kasem sam save mo oli gat gudhan lelebet long wok ya. Kristin papa mama oli save jusum wanem we pikinini blong olgeta i save mekem blong joen long wok blong prij taem oli wok tugeta. Ol pikinini we oli no kam pablisa we i no baptaes yet oli no mas go long wok blong prij olgeta nomo no wetem ol narafala pikinini. Ol papa mama oli mas mekemrere ol pikinini blong olgeta long wok blong prij mo letem olgeta blong joen long ol defren rod long wok ya, olsem ridim wan vas long Baebol, givim wan traket no wan magasin, no soem long man blong haos wan pija we i stap long ol buk. Taem pikinini i gru i kam bigwan lelebet, ating hem i save joen moa long storeyan.

Wetem stret trening, ol yangwan oli lanem blong tinghevi long wok blong prij taem oli folem rod we ol papa mama oli soem long olgeta mo taem oli mekem wok long wan fasin we i stret. Ol papa mama oli no mas livim ol pikinini blong olgeta we oli no pablisa we oli no baptaes yet, long miting blong wok blong prij olgeta nomo, we oli ting se ol narafala bambae oli lukaot long olgeta. Ol papa mama we oli gat pikinini oli mas luksave responsabiliti blong olgeta blong lukaot long wok blong ol pikinini blong olgeta. I tru, ol narafala pablisa we oli stret blong karem responsabiliti oli rere blong givhan mo trenem ol yangfala pikinini blong kongregesen we oli soemaot tru se oli wantem mekem wok blong Jeova.