?Yu Luk Wan We i Gat Nid?

¹ Baebol i tokbaot Jeova, olsem wan Man we i rere oltaem blong Givhan, mo i olsem wan Sefples blong Haed. Yumi save se taem yumi gat nid yumi save go long hem, mo bambae hem i halpem yumi. (Sam 18:2; 46:1) Yumi save folem fasin ya blong hem blong tingbaot narafala, sipos yumi rere blong givhan long narafala taem yumi luk se oli nidim samting.

² ?Wanem samting i pusum wan man blong traehad blong halpem narafala we i gat nid? Plante man oli luksave se hemia i stret samting blong mekem, mo i soem lav. Yes, Tok blong God i pulum yumi blong folem fasin ya. (Rom 15:1) Pol i pusum yumi blong ‘no lukaot long ol bisnes blong yumi nomo, be blong lukaotgud long ol bisnes blong ol narafala man tu.’​—Fil. 2:4.

³ Hemia wan samting we yumi evriwan i save faenem glad long hem. (Wok 20:35) Pol i makemaot yangfala Timote olsem wan eksampel, we hem i “tingbaot tumas” ol brata blong hem. (Fil. 2:20) Tede, i gud tumas we yumi gat plante yangfala wetem sem tingting ya, insaed long kongregesen. Be, nating se yumi yangfala no olfala, i gat sam samting we yumi save mekem, taem yumi luk wan we i gat nid.

⁴ ?Samtaem yu harem se samfala oli gat sam nid, we yumi no intres naf long olgeta? Ating wan brata no sista i stap long hospital, mo smol man nomo oli go luk hem; no maet wan i kam sik mo i no gat wan we i rere blong givim help long hem, no mekem smol wok long haos blong hem. Jisas i luk ol man blong Jeova olsem ol memba blong wan famle, we evriwan long olgeta oli rili soemaot fasin keagud insaed long famle ya. (Mak 3:​33-35) Long parabol blong ol sipsip mo ol nani, hem i soem se ol sipsip oli stap long raethan blong King we i glad long olgeta, from we oli stap halpem ol brata blong King ya.​—Mat. 25:40.

⁵ ?Olsem Wanem Mi Mi Save Givhan? ?Yumi save mekem wanem blong givhan, taem yumi luksave klia se wan i gat nid? ?I gat wan samting we yumi save mekem blong givhan? Ating i gat sam olfala we oli nidim toktok blong leftemap tingting blong olgeta, be oli no gat wan fren we i stap kolosap long olgeta blong givhan long olgeta. Maet i gat sam yangfala we oli nidim help. Ating wan famle we i jes stat blong intres long trutok oli gat plante pikinini, ale oli kam long miting long Haos Kingdom taem pablisa we i mekem stadi blong olgeta i no stap. Oli save glad sipos i gat wan brata no sista we i rere blong halpem olgeta wetem ol pikinini blong olgeta.

⁶ Taem lav blong yumi long trutok mo ogenaesesen blong Jeova i stap gru, fasin blong yumi blong laekem mo kea long ol narafala long kongregesen i mas gru moa tu. Pol i leftemap tingting blong yumi blong mekem fasin ya i kam bigwan moa. (2 Kor. 6:​11-13) Jisas i makem se taem yumi soemaot lav long narafala, hemia bigfala rod blong pruvum se yumi rili ol man blong hem.​—Jon 13:35.

⁷ Taswe, taem yumi luk wan we i gat nid, trufala lav long ol brata blong yumi mo long kongregesen, i mas pusum yumi blong tekem aksin mo givhan long enikaen rod we yumi naf blong mekem. (Gal. 6:​9, 10) Taem yumi tingbaot ol narafala olsem, samting ya i mekem yumi kam tugeta moa long lav mo yumi joengud. (1 Kor. 10:24) Long rod ya, yumi stap mekem wok blong yumi blong halpem wan we i gat nid insaed long kongregesen.