?Wanem Plan Blong Yu Long Hot Taem?

Taem yumi tingbaot hot taem, yumi tingbaot gudfala weta, yumi tingbaot ol plan blong go long wan asembli, mo yumi tingbaot ol plan blong spel no blong visitim ol famle mo fren. Taem yu mekem ol plan long taem ya, i gat sam samting blong tingbaot we oli save givhan long yu blong putum ol wok blong Kingdom fastaem:

◼ Mekemgud ol plan blong yu blong kam long spesel dei asembli. Longtaem bifo long asembli, faenem wan transpot mo wan ples blong slip, samting ya bambae i mekem se yu no hadwok.

◼ Sipos yu go spel long narafala ples, mekem plan blong joen long ol miting mo wok blong prij long ples ya. Meksua se yu givim ripot blong prij blong yu; maet i nidim blong putum ripot blong yu long leta mo sanem i go long sekretari blong kongregesen.

◼ Taem yu visitim ol famle we oli no stap long trutok, maet yu gat jans blong prij long olgeta. Meksua se yu karem Baebol blong yu mo sam narafala buk i go wetem yu.

◼ Sipos yu stap long Port-Vila no long Luganville, ?yu tingbaot finis blong go givhan long wan grup long aelan we i nidim moa man blong prij? Storeyan wetem ol elda no seket elda blong save ol nid long saed ya.

◼ Ol skul holide oli wan nambawan jans long ol yangfala blong prij moa. Yangfala, ?yu yu save mekem wok blong haftaem paenia?

◼ From we weta i gud mo ol dei oli longfala, maet yu save kasem gudfala frut long wok blong prij long sapa, taem we bighaf blong ol man oli stap long haos.

◼ Ol elda oli mas meksua se ol wok long kongregesen oli gohed gud. Oli mas faenem narafala we i save mekem ol wok no ol tok long ples blong hemia we i go spel.

Tingbaot se, “man we i mekem gudfala plan mo i stap wok strong long hem, hem i save kasem plante samting.” (Prov. 21:5) Mekem plan blong yusumgud olgeta jans we yu gat long hot taem, blong mekem moa long ol tiokratik wok.