?Sam Moa Pablisa Oli Save Statem Wan Baebol Stadi?
1 ?Yu yu gat wan Baebol stadi? Sipos no, ?yu yu wantem lidim wan Baebol stadi? Jisas i soemaot klia se i no naf blong givim wetnes nomo long ol man. Antap long samting ya, yumi mas givhan long olgeta we oli intres blong gohed long trutok. (Jon 4:39-42) Be, ol ripot blong wok blong prij oli soem se plante pablisa oli neva gat jans ya blong lidim wan Baebol stadi long haos blong wan man. Mo samfala we bifo oli gat wan Baebol stadi, oli no moa gat naoia.
2 Sipos yumi reregud from wan Baebol stadi, mo yumi mekem Baebol stadi ya evri wik, bambae Jeova i blesem ol traehad blong yumi. Traem askem long samfala long kongregesen we oli gat sam Baebol stadi we oli gohed gud, mo bambae oli talem long yu kwiktaem se oli stap kasem bigfala glad long wok ya.
3 Buklet ya “Samting We God i Wantem” i givhan bigwan blong statem ol nyufala Baebol stadi. Yumi save putum wan gudfala faondesen taem yumi stadi wetem wan man long buklet ya. Afta, yumi save pulum man ya blong gohed blong stadi dip moa wetem buk ya Save.
4 Olsem Wanem Blong Statem Wan Baebol Stadi: Taem yumi livim wan buk wetem wan man, sipos hem i intres gud, yumi save stap smoltaem moa. Yumi save statem Baebol stadi stret long taem ya. Yumi save jusumaot wan japta blong buklet ya we i stret long samting we man ya i intres long hem. Ale, yumi save ridim wan kwestin long stat blong japta ya, mo ridim ol haf we oli joen wetem kwestin ya, nao yumi save ridim mo tokbaot ol impoten vas.
5 Antap long fasin ya blong statem Baebol stadi long wok blong prij, ?yumi traem finis blong statem Baebol stadi wetem ol man we oli stap raonabaot long yumi, no ol narafala man we yumi save olgeta, no ol famle blong yumi? ?Mo sipos yumi bin traem blong mekem samting ya bifo finis, yumi traem blong mekem bakegen, i no longtaem i pas? Yumi save storeyan wetem ol fren, long wok, long skul, mo wetem ol tija, long ol kwestin mo ol wari blong olgeta, mo sloslou, yumi save pulum olgeta ya blong lukluk i go long Baebol mo blong stadi. Sipos yumi yusum Baebol blong givim ol ansa we oli klia, sot, mo we oli leftemap tingting, samting ya i save pruvum long olgeta se tok blong Baebol i nambawan. Yumi save mekem stadi long spel long dina, no afta wok, afta skul, no long wan narafala taem we i stret, from we stadi ya i no mas tekem moa long 15 no 20 menet.
6 I tru se fasin blong mekemrere i impoten tumas. Taem yu visitim wan man bakegen, yu mas savegud long tingting blong yu ol samting we bambae yu tokbaot. Taem yu mekemrere wan visit, i gud we yu tingbaot se evri visit we bambae yu mekem long man ya oli save givhan long yu blong kasem mak ya blong statem wan Baebol stadi.
7 Ol Wok 20:35 i soem se yumi save haremgud mo kasem plante glad taem yumi serem ol samting blong yumi wetem narafala. Taem yumi lidim wan Baebol stadi, hemia wan nambawan jans blong kasem glad ya. I gud se yumi traehad blong kasem mak ya we yumi joen long wok ya.