Ol Faswan Storeyan We Oli Karem Frut
1 I had blong statem toktok long wok blong prij from ol man oli bisi long prapa wok blong olgeta no oli gat prapa tingting long saed blong ol skul. ?Wanem samting i save givhan long yumi blong mekem ol faswan storeyan blong yumi oli karem frut?
2 From we hem i wan taem blong holede, maet yu save statem toktok blong yu olsem ya se:
◼ “Long manis ya, yumi stap tingbaot sakrafaes blong ded blong Jisas. ?Yu ting se naoia Jisas i stap mekem wanem?” Letem hem i ansa. Nao maet yu save toktok wetem man blong haos long Revelesen 6:2 we i tokbaot Jisas se i sidaon long wan waet hos mo i stap ron blong finisim faet blong hem. Tokbaot wok blong hem olsem wan king mo ol blesing we hem i save givim long ol man we oli stap obei.
3 Taem yumi givimaot magasin ya blong Epril 1 we i tokbaot haf ya “Trufala Fasin Fri—?Hu i Stampa Blong Hem?,” maet yu save talem se:
◼ “Ol man long olgeta ples long wol oli stap traehad blong gat fasin fri. Be toktok blong fasin fri we ol gavman blong ol man oli stap talem oli no karem frut. Fasin blong wosip long Jeova, trufala God, i save givim fasin fri blong olwe long ol man.” Ridim 2 Korin 3:17, mo soemaot se magasin ya Wajtaoa i makemaot ol promes blong God mo i soemaot from wanem ol samting we oli stap kamaot long wol oli makemaot se fasin fri blong yumi i kolosap.
4 Yu save yusum “Wajtaoa” blong Epril 15, 1992, sipos yu tokbaot haf ya long saed blong prea, yu save talem se:
◼ “Ol man oli stap prea blong win long faet. ?Yu ting se God i stap lesin long ol prea olsem mo i stap halpem ol man blong oli faetem ol narafala man? [Letem hem i ansa.] Tingbaot ansa we Baebol i givim.” Yu save ridim mo tokbaot 1 Pita 3:12. Afta we yu eksplenem, soemaot haf blong Wajtaoa we i save pulum intres blong man blong ridim magasin ya. Yu no fraet blong askem sabskripsen.
5 Tingbaot mak blong yumi blong mekem ol Baebol stadi. From we plante man bambae oli mekem haftaem paenia long Epril, bambae yumi save gat moa jans blong faenem ol man we oli intres blong stadi Baebol. Be sipos yumi no gat jans blong mekem haftaem paenia long Epril, yumi save putum mak blong statem wan Baebol stadi.
6 Sam pablisa oli yusum traket blong statem ol Baebol stadi taem oli prij.
Taem yu givimaot traket ya “Laef Long Pis Blong Nyufala Wol,” maet yu save talem se:
◼ “Mifala i wantem visitim ol man. Bambae mi mi givim traket ya long yu, we i save tokbaot wok blong mifala. ?Yu ting se wol bambae i save kam olsemia?” Afta we hem i givim ansa, yu save tokbaot ol faswan haf blong traket ya wetem hem, tokbaot Matyu 6:9, 10 mo Ol Sam 37:29.
7 Tingtinggud olsem wanem bambae yu statem tok blong yu. I gat ol gudfala rod blong yusum long Reasoning buk pej 9 kasem 15. Yusumgud ol fastok ya we bambae i givhan long yu blong mekem ol faswan storeyan oli karem frut.