Kakae Blong Speret Evri Dei—Hem i Impoten Long Wan Kristin Famle
1 “Kakae nomo i no save mekem man i laef. Evri tok we God i talem, hemia nao samting blong mekem man i laef.” (Mat. 4:4) !Ol tok ya oli tru tumas! Yumi nidim kakae long saed blong bodi evri dei, sem mak yumi nidim kakae long saed blong speret evri dei. Blong givhan long yumi se oltaem yumi kakae long Tok blong God, Sosaete i wokem buklet ya Ridimgud Ol Tok Blong Baebol Evri Dei. ?Yu wan Kristin famle, evri dei yu stap tekem taem blong lukluk long vas blong dei?
2 Ol Papa Mama Oli Mas Givim Eksampel: From we laef i bisi tumas, i isi blong livim vas blong dei, maet yu tingbaot blong mekem long wan narafala taem. Be sipos ol papa mama oli tingbaot ol nid blong famle blong olgeta long saed blong speret, bambae oli faenemaot se i gat taem blong mekem, yes, traem holem taem blong mekem, evri dei yu save mekem olsem taem famle i joen wanples. (Mat. 5:3) Bambae oli tingbaot se oli no ridim vas blong dei nomo wetem pikinini blong olgeta be oli save makem ol bigfala poen long ol Wajtaoa tu mo tokbaot olsem wanem ol advaes mo ol tok ya oli save wok long laef blong olgeta. Tru ya, maet i hadwok blong mekem olsem mo i tekem taem blong langud blong gat fasin ya, be ol blesing we bambae oli kamaot from i soemaot se i gud blong traem. (Lukluk Ol Wok 17:11, 12.) !Taswe, ol papa mama, oli mas traehad blong soem wan gudfala eksampel!
3 Faenem Wan Gudfala Taem: ?Wanem taem i gud blong ful famle i joen wanples blong tokbaot vas blong dei, mo oli no save mestem sam samtaem? I gud blong statem dei wetem storeyan long vas blong dei. Long Betel mo long ol haos blong misinari long olgeta ples long wol, oli statem wok blong dei wetem wosip long moning, i min se oli storeyan smol long vas blong dei. Samting ya i givhan long ol brata blong mekem wan gudfala stat long dei ya, mo long dei ya oli save tingbaot wanem Jeova i talem long olgeta.—Sam 1:1, 2; Fil. 4:8.
4 Ol Kristin famle tu oli save haremgud long storeyan long vas blong Baebol long moning. Ol pikinini oli save kasem help blong oli winim ol traem long saed blong speret we oli stap kasem long skul. Sipos samtaem ful famle i no save joen blong tokbaot vas blong dei, ol papa mama oli mas tingbaot narafala taem blong oli no mestem impoten kakae long saed blong speret ya. Eksampel, taem wan papa i mas girap mo i go long wok bifo we ol pikinini oli save girap, maet mama i save tekem taem blong tokbaot vas blong dei wetem ol pikinini blong tufala. Mo tu, sam famle oli mekem plan blong storeyan long vas blong dei long naet from we oli joen wanples long taem olsem. Evri famle wanwan oli save mekem plan we i stret long olgeta.
5 Kakae long saed blong speret evri dei i impoten tumas long wan Kristin famle. Faswan samting blong yu tingbaot hemia vas blong dei. (Fil. 1:10) Storeyan long vas blong dei evri dei i save givhan long yumi blong yumi holemstrong long ol stret rul blong Jeova mo long ol loa blong hem. Sipos ol memba blong famle wanwan oli wok tugeta bambae samting ya i mekem se oli save kasem blesing from.