Ol Fastok We Oli Isi Mo Wokgud
1 Jisas i talemaot Kingdom blong God long wan fasin we i isi mo stret nomo. Hem i save se ol man we oli olsem sipsip bambae oli lesingud taem oli harem trutok. Hem i save tu se ol man oli gat defren fasin blong tingting, intres, mo fasin blong tingtinggud long wan samting. Taswe, hem i yusum defren kaen fastok we oli no strong, ol kwestin, mo pijatok blong pulum tingting blong ol man we oli stap lesin long hem mo blong tajem hat blong olgeta. Yumi save folem eksampel blong hem mo yusum ol fastok we oli isi mo wokgud.
2 Yusumgud Reasoning Buk: Faswan fastok aninit long stampa tok ya “Wok/Haos” (“Employment/Housing”) long pej 11 blong Reasoning buk i stret mo isi blong yusum.
Yu save talem se:
◼ “Mifala i stap toktok wetem ol man raonabaot long yu long saed long samting we i save mekem se i save gat inaf wok mo haos blong evriwan. ?Yu ting se i stret blong talem se ol gavman blong man oli save mekem samting ya? . . . I gat wan man we i save olsem wanem blong winim ol trabol ya; hem ya Man we i Wokem ol man.” Ridim Aesea 65: 21-23. Afta yu save askem long man blong haos wanem tingting blong hem long tok ya.
3 Fastok aninit long stampa tok ya “Injustice/Suffering” long pej 12 i stret long plante man tede.
Yu save askem se:
◼ “Yu bin tingbaot samtaem se: ?God i rili kea long rabis fasin mo fasin nogud we oli stap kasem ol man tede?” Letem man blong haos blong ansa mo ridim Eklesiastis 4:1 mo Ol Sam 72: 12-14. Afta yusum Laef Foreva buk, openem i go long ol pija long pej 150-153 mo soem olsem wanem ol samting we oli stap long wol tede oli stap fulumap sam profet tok blong Baebol. Nao openem i go long pej 161-162 blong soem wanem blesing God i talem se ol man bambae oli kasem. Askem man blong haos weswan long olgeta samting ya we i stret moa long hem.
4 Afta smol storeyan we yu mekem wetem man blong haos, yu save soem long hem olsem wanem oli save yusum buk ya blong mekem wan fri Baebol stadi wetem hem (man blong haos) mo mekem wan stret plan blong luk man ya bakegen. Sipos man blong haos i no karem buk, yu save yusum buklet ya ?God i Rili Kea Long Yumi? no traket ya ?Wol Ya Bambae i Lus No i Stap?
Eksampel, afta we yu yusum fastok long haf 2 blong haf ya, yu save talem se:
◼ “Buklet ya ?God i Rili Kea Long Yumi?, i eksplenem klia wanem samting God i promes long hem blong mekem, blong kea long nid blong yumi evri dei mo soem olsem wanem yumi save haremgud from.” Openem i go long pej 26 mo 27 blong buklet, mo pulum tingting long haf 21.
5 No afta we yu yusum fastok blong haf 3, i gud blong tokbaot ol bigfala poen blong traket ya ?Wol Ya Bambae i Lus No i Stap?
Yu save talem se:
◼ “I gat plante trabol mo fasin pua long wol tede. Traket ya i soemaot se faet, kakae i sot, mo trabol long saed blong helt oli profet tok we Baebol i bin talem bifo. Be God i promes tu blong mekem wan gudfala jenis long ol man.” Ridim laswan haf long pej 5 blong traket.
6 Trufala intres long ol man, wetem isi mo gudfala fastok we i tajem hat, bambae i stret long ol man we oli olsem sipsip.—Jon 10:16.